MINISTA bilong Edukesen, Jimmy Uguro i askim ol tisa na ol skul bod long ol i no ken rausim ol sumatin husat i no baim skul fi.

Em i mekim dispela tok long las wik Fraide long Madang taim em i go bek long provins olsem Minista bilong Edukesen.

Mista Uguro i mekim dispela toktok long ai bilong Minista bilong Haia Edukesen, Sains na Teknoloji, Wesley Raminai taim tupela i bungim ol nius lain long Madang.

Bihain long dispela Uguro i mekim wankain toktok long ol manmeri long Ramu Suga long Usino Bundi distrik.

Em i tok Treseri Dipatmen i bin givim K122 milien i go long ol skul.

Long dispela wik Mande, Janueri 25 em skul fi bilong namba wan hap bilong dispela yia 2021 i go pinis long akaun bilong ol skul husat i gat nem long kisim tusen fi fri (TFF) sabsidi i kam long gavman.

Em i tok gavman tusen fi sabsidi polisi bilong dispela skul yia bai stap long K486 milien.

Dispela TFF helpim i rausim ol hevi ol papamama i save bungim long olgeta skul yia.

Em i tok dispela i wankain mani mak olsem long las yia.

Uguro i tok TFF polisi i gat tupela hap bilong en we bai i karamapim skul operesen na fanresing grent em mani mak olsem K389 milien.

Long dispela 80 pesen na arapela em komoditi hap olsem K97 milien em 20 pesen.

Em i tok taim PM Marape i makim em olsem Edukesen minista em i no lusim taim.

Em i stat wok stret long Desemba 21 pastaim long Krismas long painim mani long helpim ol skul long kantri.

Dispela em bikos em i save long hevi na pen ol skul i save gat long stat bilong skul yia.

Em i stap olsem Edukesen plena bilong Usino-Bundi distrik na Madang na em i save long hevi bilong ol skul.

Em i tok ol skul i ken kisim ol projek fi tasol ol i mas bihainim stretpela rot o lo wantaim ol gaid lains.

Ol projek fi em ol provinsal Edukesen bod bai i kamapim na givim tok orait long en.

Tasol ol dispela projek fi i no ken go antap long mak o limit em gavman i makim long en.

Ol projek fi em elementeri - K5, praimeri - K7 na haiskul/sekenderi na ol vokesenel senta - K10.

James G. Kila i raitim