Yunivesti bilong teknoloji bai yusim sola pawa long wanpela dipatmen bilong en insait long skul.

Ol sumatin long Elektrikel Dipatmen bai mekim dispela projek. Ol bai putim ol sola panel antap long ruf bilong ol haus lo kisim pawa long san.

Bihain bai dispela projek i go long ol narapela dipatmen insait long Unitech.

Edministresen insait long skul i givim K300,000 long dispela dipatmen long mekim dispela wok.

Vais Sensela bilong Unitech Dokta Ora Renagi i tok dispela yunivesti i  mas mekim ol dispela wok wantaim ol resos i stap long en na bai helpim long katim daun ol mani skul i save peim long pawa.

“Ol enjinia sumatin bilong mipela wantaim ol lekjura bai mekim dispela projek long helpim ol sumating long bihain taim ol i pinisim skul,” Dokta Renagi i tok.

Taim ol dispela sumatin i greduet ol bai wok gut na givim sevis long ol pipel. Mipela i no inap long lainim ol long pepa tasol wantaim ol dispela projek ol ken kamap gutpela wok manmeri bilong putim ol sola lait long kantri, Dokta i tok.

Ekting Het bilong Dipatmen bilong Elekrikel Enjiniaring Dokta Moses Kavi i bai go pas long dispela projek i tok dispela projek. Em i tok dispela projek  bai kisim 889 mita. Ol bai givim 190 kilowat bilong pawa long dipatmen.

Dokta Kavi i tok, “Wantaim dispela pawa dipatmen i ken yusim olgeta lait na fen.”

Dokta Kavi i tok yunivesti  i save peim K2 milen long wanpela yia long kisim pawa. Sapos ol i putim sola pawa long olgeta dipatmen em bai yunivesti sevim mani.

Em i tingitng long mekim dispela wok i go moa long ol narapela dipatmen insait long skul.

UPNG Jenelis Sumatin Samantha Solomon i raitim