OL Yunaitet Sios manmeri long Baai ples insait long Kombiu LLG long Rabaul, Is Nu Briten Provins i no gat gutpela haus lotu long bung wantaim pre.

Dispela i bikpela salens bilong ol long wok bilong strongim bilip bilong ol.

Tasol dispela salens nau bai samting bilong bipo bihain long ol i kisim K300,000 sapot long Saina PNG Poroman Asosiesen wokim nupela haus lotu bilong ol. 

Wogan Petelom husat i lidaman bilong sios na komyuniti wantaim i tok ol Saina binis kampani i stap long Rabaul i givim mani taim ol i harim olsem ol i laikim helpim long kamapim haus lotu.

Em i tok tenkyu long helpim bilong ol.

Em i tok olsem haus lotu ol i wokim long 1962 na manmeri i no yusim nau.

Moa yet, em i tok maunten paia long 1994 i bagarapim ples na planti manmeri bilong ol i bin ranawe i go stap long Gelegele setelmen na ol arapela setelmen na i lusim haus lotu i go bagarap.

Wogan i tok i nogat planti manmeri i stap long Baai ples nau na ol i yusim liklik bruk haus lotu long mekim lotu arere long nambis.

Em i tok planti manmeri i wok long go bek long Baaina , wokim haus lotu na lotu long hap.

Long wankain taim Presiden bilong Saina PNG Asosiesen, Irene Seeto i tok mani ol i kisim I ksm long ol Saina bisnis komyuniti long Is Nu Briten.

Irene i tok ol i amamas long helpim bikos kain sapot i strogim poro pasin namel long ol Saina na ol long Is Niu Briten.

Em i tok wok bilong wokim haus lotu i bikpela samting na Saina Asosiesen bai givim sapot long ol long wokim haus lotu inap wok i pinis.

Michael Novingu i raitim