Yumi lusim ol, olsem pisin i lusim umben wanpela man i putim, na i flai i go. Dispela umben i bruk pinis, na yumi no moa pas long en.

Buk song 124:7

Wanpela pasto i wok long wanpela famili papa bilong ol i pas tru long dring. Wanpela de dispela papa i bin spak nogut tru na em i brukim tebol na sia samting. Em tu i  paitim meri bilong em nogut tru.

Pasto i harim tok long samting i bin kamap na em i go lukim dispela man. Em i kamap long haus bilong en na i lukim em i sindaun wantaim liklik boi bilong en. Dispela boi i gat 5-pela krismas samting.

Pasto i sekanim dispela papa na i tok, “Samting i go kranki gen, a?”  Dispela spakman i no bekim askim bilong pasto. Em i kirap na i go long narapela rum. Em i kam bek wantaim wanpela rop nau em i pasim pikinini bilong em strong tru long sia. Em i pasim em pinis na em i  bikmaus tru, “Yu kirap nau!” Liklik boi i krai na tok, “Mi no inap”

Spakman i lukluk long pasto na i tok, “Em nau. Mi wankain tru. Mi no inap lusim dispela pasin nogut. Mi no inap tru.” Wanpela tingting i kam kwik long tingting bilong pasto na em i kisim liklik poket naip bilong en na i katim rop. Em i tokim boi isi tasol, “Yu kirap nau.” Na liklik boi i kirap kwik.

Pasto i lukluk i go long papa na i tok, “Harim. Wanpela i bin kam bilong katim olgeta rop i laik pasim yumi. Jisas, pikinini bilong God, em i inap katim olgeta rop na mekim yumi kamap fri long kalabus bilong satan. Em i laik mekim yu fri long dispela pasin bilong dring strongpela dring.”

Dia pren na wantok, taim yu ritim dispela stori, yu ting olsem wanem long yu yet? Jisas i katim pinis olgeta rop bilong pasin nogut long laip bilong yu? O yu pas yet long kain kain pasin nogut, a? Kam long Jisas tude. Em i redi long katim na rausim yu long kalabus bilong satan na mekim yu kamap fri.

Jerry Tupex i raitim