NESENEL Pasto Konprens bai kamap long Mumeng Distrik long Lae Morobe Provins bihain long tupela yia.

Dispela Nesenel Pasto Konfrens i save kamap bihain long tupela yia olgeta taim, olsem na Mumeng Distrik bai go pas long holim dispela konfrens bilong dispela yia.

Long 2019 Nesenel Pasto Konprens i bin kamap long Jiwaka we ol i bin lukim bikpela sapot i kam long ol Kristen bilong Jiwaka na memba bilong Not Waghi Dokta Fabian Pok.

Presiden bilong ELC Mumeng Distrik Reveren Tau Binato i bin toksave pinis olsem ol laik holim long Timini Lutheran skul tasol bihain sampela toktok kamap namel long ol pipel i no bin stret olsem na ol bai holim konprens long Zenag stesen we gutpela luksave na ol Kristen i wanbel long dispela sios wok, olsem na ol bai statim konprens long Septemba 2021.

Reveren Binato i bin makim Mumeng ELC Kristen na tokaut olsem ol i suruk long holim dispela bung we i bai bungim olgeta pasto bilong olgeta 17-pela distrik bilong ELC PNG long tok toktok long ol hevi na welfea bilong sios, na givim ol ripot bilong wok ol i bin wokim insait long sios moa long 15-pela na 20 krismas.

Dispela konprens bai skelim gutpela na no gut bilong olgeta wok manmeri bilong ELC PNG sios. Na long wankain taim Deputi Praim Minista na Memba bilong Wau Bulolo Sam Basil tu bai sanap beksait wantaim ol bilip manmeri bilong Mumeng Luteran sios long givim sampela toktok wankain olsem long 2019 em i bin go long Jiwaka konfrens wantaim Dokta Fabian Pok.

Long wankain taim planti ektiviti bai kamap we ol Sande skul pikinini bilong Mumeng Distrik na mama grup bai soim sampela so long amamasim ol spesel ges long konprens, olsem Reveren Tau Binato hsuat i bai makim ol Kristen na toktok, na Seketeri bilong sios Mista Steven Kambang bai makim wan wan Kristen husat bai ol lukautim dispela konprens.

Paulus Tali i raitim