SIF Eksekutiv Opisa (CEO) bilong Isten Hailans Provinsel Helt Atoriti (EHPHA) i bin amamas long lukim Rice Industries i kamap na patna wantaim em long taim em i kamap wantaim ol rais beg na givim i go long Goroka Provinsel haus sik.

“Dispela luksave bilong rais indastri long kamap olsem patna na sapotim Goroka haus sik wantaim ol beg rais em i bikpela samting, long wanem, long kain taim olsem taim mipela i wok long i go insait long ol taim nogut, dispela sapot  bai i ken helpim mipela long kisim strong na mekim wok i go het yet long haus sik,” Dokta Apa i tok.

Em i amamas long Rice Industries long kamap olsem wanpela patna bilong EHPHA.

Eria menesa bilong Rice Industries long Goroka Vagi Asitore i tok, kampani bilong em i save helpim planti ol arapela lain long provins, tasol em i no save lukluk long kain ples olsem haus sik. Olsem na dispela em i namba wan taim stret long kampani bilong em bai i ken bringim kain helpim i go long haus sik.

“Mipela i gat bikpela namba bilong ol kastoma husat i save kamap na baim ol rais na Goroka haus sik em i wanpela long ol kastoma bilong mipela husat i save baim rais long kukim na givim long ol sik lain.

“Olsem na dispela helpim, mipela laik givim i go bek long ol kastoma bilong mipela, na mipela laik strongim tu patnasip wantaim EHPHA long nau na ol yia i kam bihain”, Asitore i tok.

Sape Metta i raitim