OL SIOS husat i wok long kantri i bin kamap long Wol Relijen De na i tok long bung na wok wantaim.

Dispela bung i bin kamap long Nature Park long Pot Mosbi long Mande.

Ol lida bilong Katolik, Evanjelikal Luteran Sios (ELC PNG), Yunaitet, Seven De Edventis (SDA), Islam, Baha’i na Evanjelikal Alaiens i bin kamap long dispela bung.

Het tok bilong dispela bung em “Unity, Respect and Reverence.”

Dispela i min yu mas gat rispek, givim luksave long narapela na bung wantaim em.

Lahui Lovai, Komyunikesen Opisa bilong PNG Kaunsil ov Sios i tok long luksave long het tok bilong bung, wan wan ol lida long ol sios olsem Kristen, Baha’I, Hinduisim, Judaisim na Islam i bin ritim wanpela hap rit o tok i stap long Holi buk bilong ol.

“Mipela i hop olsem kain bung bai helpim mipela long luksave long strong bilong mipela na mekim mipela i givim luksave long wanpela na narapela long wok bung wantaim,” Lovai i tok.

“Dispela em long strongim wok bilong yuniti, rispek na hamoni.”

Kardinal Sir John Ribat i tok dispela i nupela kain bung na i soim olsem i gat nid long ol sios i mas bung planti long strongim spirit bilong yuniti.

Muslim lida, Imam Ahmed Deedat i tokaut long wei ol relijen i stap na i tok olsem olgeta i sios i gat ol skul tok bilong stap isi na stap wantaim ol arapela.

Mis Gezina Volmer, Dairekta bilong Baha’i Opis long PNG i tok ol sios i mas luksave long strong bilong ol arapela sios na bung wantaim ol long kamapim bel isi.
Wol Relijen De i bin stat long 2017 long kisim taim na luksave long ol sios long wol.

Olsem 80 kantri i amamasim dispela de long wol.

Nigel Akuani i raitim