TOK halo long wanpela na narapela wantaim smail, skruim het o tok halo tasol long narapela na i no ken sikan o bamim han, Kontrola bilong Nesenel Pandemik David Manning i tok.

Em i toksave gen long ol pipel bilong Papua Niugini long bihainim ol lo bilong nupela pasin na abrusim sik COVID-19.

“Werim pes mask o karamapim pes bilong yu taim yu stap long pablik ples. Dispela em long lukautim yu na ol arapela long COVID-19. Klinim han bilong yu klostu klostu. Wasim wantaim sop na wara o yusim marasin wara long wasim han. Stap longwe olsem 1.5 mita long narapela. I no ken tasim maus, ai na nus bilong yu. Kus i go insait long han skru bilong yu na i no long han. Daunim o stopim pasin bilong raun long ol ples we ol manmeri i save pulap long en. Na klinim ol samting na ples we yu save tasim olgeta taim,” Kontrola David Manning i tok.

Em i tok ol sitisen i mas kisim dispela nupela pasin na putim insait long laip bilong ol bai dispela i sevim planti laip.

Ol pipel i no wok long harim tok na bihainim nupela pasin olsem na namba bilong COVID-19 keis i wok long i go antap. Opis bilong Kontrola i ripotim 8-pela nupela keis long Tunde na dispela i apim namba bilong COVID-19 keis i go 843 long kantri.

Tupela bilong ol dispela keis i stap long NCD na 8-pela em long Wes Nu Briten provins.

Long NCD, wanpela helt kea wokmeri husat i gat 58 krismas i kisim dispela sik. Em i save stap long Mosbi Saut Ilektoret na i no bin soim sain bilong COVID-19 tasol test risal i soim olsem em i gat COVID-19. Narapela, em wanpela man husat i gat 28 krismas na i save stap long Mosbi Saut tu. Dispela man i bin soim sain bilong COVID-19 olsem skin hat taim ol i testim em.

Na ol sikispela long Wes Nu Briten em tupela meri na foapela man, olgeta yet i bilong Talasia Distrik. Ol i no bin soim sain bilong COVID-19 tasol risal i soim olsem ol i gat COVID-19.

Kontrola Manning i tok planti bilong ol dispela keis i kamap bikos long komyuniti trensmisen. Olsem na em i tok dispela i soim olsem ol pipel i mas kisim was na bihainim ol lo bilong nupela pasin.

Rebecca Negere i raitim