Ol mak bilong hevi bilong tingting planti i wok long kilim man stap long ol komyuniti bilong yumi.

Memba bilong Milen Be,Davis Steven i bin go long ol komyuniti long ples na bung wantaim ol pipel long stretim dispela hevi i wok long bagarapim ples.

Skul fi bilong ol pikinini i go antap na planti ol papamama i pilim het pen long hevi bilong salim pikinini go long skul long kisim save long las yia.

Ol papamama na pablik i laik bai skul bilong dispela yia 2021 bai ran gut stret wantaim helpim bilong gavman fan bai kam insait long skul.

“Skul we stap insait long rimot ples klostu long solwara kain olsem Milen Be em bai wanpela kain samting taim gavman i helpim ol wantaim skul fi long taim,”Memba bilong Milen Be Steven i tok.

Long dispela yia Gavman i apim tru skul fi na em kamap hevi long ol papamama.

Las yia taim ol i makim nupela gavman Praim Minista i senisim dispela fri edukesen polisi i go long polisi bilong hap papamama bai baim na hap Gavman bai baim. Dispela i mekim na i bin givim bikpela hevi long papamama bilong wanem ol i no bin redi long dispela senis.

Minista bilong Edukesen Jimmy Uguro i tok gavman i nidim moa long K200 milien bilong skul fi bilong yia 2021.

Na tu hevi bilong COVID-19 pandemiki mekim ol skul sistem i no klia gut long hau bai ol stat skul bilong dispela yia. Dispela pandemik i mekim ol skul i no soim gutpela risal bilong exam long las yia we 25 000 gred 12 i no bin kisim ofa bilong ol long go long bikpela skul.

Ol dispela kain samting i mekim na bagarapim tingting bilong ol famili long hau ol i bai stretim sidaun bilong ol pikinini bilong ol.

Gavman i bai mekim wanem long stopim dispela hevi i wok long afektim laip bilong ol yut na papamama bilong ol.

Ol lida bilong ples bai helpim ol papamama long stretim dispela hevi tasol ol i askim tu gavman long luksave long wari bilong ol tu na mas stretim wari bilong ol na ol pikinini bilong ol long skul fi na statim dispela yia gut.

UPNG Jenelis Sumatin Martina Takaneng i raitim