Gavman bai i sapotim ol sumatin wantaim Gavman Tuition Fee Subsidy (GTFAS) long dispela yia 2021.

Gavman i sanap long tok bilong em long wok klostu wantaim ol papamama, sios, nesenel bilong helpim ol sumatin long kisim save.

Marape gavman i mekim edukesen kamap namba wan samting. Em i laik givim kwaliti edukesen long 13-pela yia wantaim gutpela samting bilong yusim long lainim.

Gavman i tok long lukim dispela 1-6-6 skul straksa we bai rausim elementri level bilong skul na putim gred 1 na 2 i go stret long praimeri. Gavman i lukluk long Flexible Open Distance Edukesen (FODE) long helpim ol sumatin.

Gavman i bai sapotim FODE wantaim ful fi na bai kamapim FODE long olgeta hai skul.

Dispela GTFS polisi  bai kamapim patnasip wantaim gavman na ol papamama na komyuniti.

Bipo taim fri edukesen i kamap i bin mekim planti papamama i les long wok na stap nating. Nau taim Marape gavman i senisim dispela polisi, em i laik bai ol papamama i ken wok na kisim mani long sapotim ikonomi na sanap ol yet.

Ol lain long PNG em ol save wok hat na dispela pasin em i no moa stap tasol dispela polisi bai bungim ol skul na papamama na gavman bai helpim long stretim ol samting bilong skul.

Mani mak olsem K486,351,600 i bai go long GTFS long 2021 . Dispela mani i bai go long tupela hap, skul operesen na ran bilong en wantaim K388,351,600(80%) na komoditi K97,000,000 (20%).

Ol total fi na kost:

Gavman bai i peim ful fi bilong FODE.

Wantaim dispela baset gavman bai peim 62 pesen fi na ol papamama bai peim 38 pesen. Total namba bilong mani ol gavman na papamama bai peim em i stap long dispela tebel.

Projek Fi

Gavman i tok orait long ol skul long kolektim projek fi tasol ol mas bihainim wanem gavman i tok. Ol provinsel edukesen bod (PEB) bai givim tok orait long ol skul long kisim projek fi long ol sumatin taim ol skul i mekim gut plen bilong ol.

Ol i mas peim aninit long 20 pesen bilong nomal fi olsem em i soim long tebel.

Ol  sios skul i bai peim skul fi aninit long edukesen lo 1983. PEB bai  toksave long amas long peim tasol bai i no inap abrusim bikpela mak. Ol elementri bai baim K5, Praimeri bai baim K7 na Hai Skul na Sekenderi na Vokesenal bai baim K10.

Ol pikinini i gat rait long go long skul. Nogat wapela skul i bai stopim ol long go long skul sapos ol i no peim wanpela bilong ol fi. Sampela wanbel i mas kamap namel long ol papamama na skul long ol i ken peim ol fi namel long yia.

Ol skul tu i nidim mani long wok, long dispela ol papamama i mas wok wantaim ol long peim ol fi hariap na bai skul i ran.

Provinsel  gavman na distrik gavman i bai helpim long edukesen bilong ol pikinini. Gavman i askim ol long helpim ol sumatin long go na kisim edukesen.

Eitpela provins i sainim pepa long wok wantaim gavman long lukautim gavman skul fi bilong sabsisdi. Is Nu Briten, Is Sepik, Isten Hailens, Enga, Milen Be, Nu Ailan na Noten Provins.

Ol skul i mas gat sampela projek long mekim mani bilong skul, ol kisim strong long ol sabsidi na ol fi tasol.

Dispela pasin bilong helpim ol papamama long skelim skul fi wantaim gavman bai i kamap yet long ol yia i kam bihain.

UPNG Jenelis Sumatin Samantha Solomon  i raitim