MINISTA bilong Eduksen, Jimmy Uguro, i tok amamas na salim luksave i go long ol tisa na ol helt wokmanmeri long ol longwe ples long rurel eria long PNG husat i save givim taim bilong ol na stap makim gavman long ol rurel ples.

Uguro husat i Memba (MP) bilong Usino-Bundi distrik long Madang provins i tok planti ples long PNG we no gat gavman sevis i go insait long en, tumas bai yu save olsem gavman i stap taim ol tisa i wok i stap.

“Ol tisa i save makim gavman long planti longwe ples long kantri,” Mista Uguro i tok.

Em i tok ol tisa em ol fran lain wok lain husat i makim gavman long bringim eduksen i go insait long ol rurel o longwe ples long maunten, rurel ples na ol ailan na longwe nambis ples long Papua Niugini.

Mista Uguro husat i wanpela tren tisa na i bin wok sotpela taim tasol na em i go skul na kamap olsem eduksen plena long Usino-Bundi distrik na Madang provins i gat planti han-mak long bringim kamap gut ol stendet bilong ol skul long Usino-Bundi distrik.

Presiden bilong Usino LLG, Peiwa Aimai i tokaut olsem Uguro em trupela lida bilong ol pipel na dispela lida tasol i bringim level bilong ol skul long distrik bilong em i go long narapela level na smat tru winim na abrusim ol arapela distrik long Madang provins na tu PNG wantaim.

Mista Aimai em trupela eduksen saveman na kamap bilong em olsem Edukesen minista em trupla luksave Praim Minista James Marape i givim long dispela lokal man bilong Bil-Gara long Gama LLG.

Long wankain taim Minista Uguro i givim bikpela luksave long wanpela Katolik misinari nem bilong em Max David husat i stap wok longpela taim long Brahman Sekenderi skul long Bundi LLG.

Dispela man bilong Australia i bikpela pes long rot na i save go kam kisim ol skul samting na kaikai bilong Brahman na planti pipel namel long rot long Madang-Ramu haiwe i save gut long Max David.

Long taim bilong sik coronavirus (COVID-19) Mista David i bin go stap long Australia longpela taim liklik na i kambek.

Taim em i kambek em taim Marape i bin go givim toktok long Usino na long dispela taim Uguro i bungim em na i amamas olsem David, husat em bikpela pes o lida bilong Brahman i kambek gen long PNG bikos em trupela wokman bilong Katolik misin long Brahman, Bundi LLG na Madang provins.

James G. Kila i raitim