YUNAITET sios long Pot Mosbi, Nesenel Kapital Distrik i sori long dai bilong wanpela sios
lida bilong em.

Dispela raitai diakon em Ora Leka bilong Kelerakwa ples, Marshall Lagoon, Abau distrik
long Sentral Provins.
Em i gat 81 krismas long taim em i dai.
Leka i bin wok diakon long Gerehu Yunaitet Sios longpela taim na i ritaia long 1990s.
Bihain long dispela em i bin helpim tasol long ol wok bilong sios.
Leka i wanpela kapenta tasol i save mekim ol arapela wok tu.
Arere long dispela ol wok, Leka i bin wok olsem diakon bilong sios long Mosbi.
Wok kapenta i lukim em kisim wok long ol arapela senta bilong kantri olsem Manus, Rabaul
na Tabubil.
Bikpela toktok bilong Leka em olsem, “Yu mas traim olgeta samting. Givim gutpela sevis
long ol arapela. Bilip long God na givim luksave long em.”
Em i stat wok wantaim sios long Sir Percy Chatherton Yunaitet Sios long Koki long 1960s na
bihain go long ol arapela senta.
Long 1970s em i kisim nupela haus long Gerehu Stes 2 na dispela i kamap famili haus.
Long taim em i wok wantaim sios, em i wanpela faunding memba bilong Gavnuone Felosip
Grup (Sentral Provins) long 1980s na i helpim long mekim ol klasrum bilong Gerehu
Praimeri Skul na Gerehu Yunaitet Sios.
Kamap bilong Gerehu Yunaitet sios i bihainim driman em i lukim we Bikpela i askim em
long wokim haus lotu.
Dispela haus lotu em ol i opim long Mas, 1990.
Ol memba bilong Yunaitet Sios i tok maski Leka i lusim ol, bai ol i tingim em long wok em i
mekim, moa yet long Gerehu haus lotu.