OL Katolik manmeri long Bomana Koreksinel Sevis (CS), Bomana Polis Koles, Vanuatu
kem, Mt Eriama, Kinakon na Tanobada nau i ken amamas bikos ol gat peris pris bilong ol
yet.

Moa yet, ol nau bai gat peris pris em Pater Mercin Wrobel bilong Holy Spirit Sosaiti.
Holy Spirit Sosaiti i nupela relijes kongrigesen long kantri.
Kardinal Sir John Ribat bai go pas long lotu long dispela Sande long Sivarai Namona na
putim Pater Mercin long sia bilong peris.
Nau i gat peris bai Katolik Sios i ken save gut long hamas bilip manmeri em i gat long
dispela ol hap.
Dispela ol hap wantaim ol sumatin na tisa long Marianville na De La Salle Sekenderi i no gat
wanpela peris pris long lukautim ol.
Planti bilong dispela lain i save go lotu long Holi Spirit Tiolojikal Koles.
Sampela taim ol pater long koles i save go long hap bilong ol na wokim lotu.
Wanpela residen bilong Marianville Sekenderi, Carolyn Ketsimur i tok olgeta Sande ol i save
go long Holi Spirit Koles “Chapel” long lotu.
Em i tok sapos laki long wik de sapos pater long koles i go long skul long wokim lotu, ol bai
lotu long skul yet.