Gus Dur, em i namba foa presiden bilong Indonesia.Em i wanpela Muslim na saveman stret. Ai bilong em i no gutpela tumas tasol stretpela tingting
bilong em i winim em tru.

Wanpela taim em i gat miting wantaim ol Pater bilong Semarang Daiosis long midel Java. Em i
bin stori long ol Pater wanpela stori long laion i wokim prea.
Wanpela Pater em i gat hobi bilong em long go painim ol wel abus, kilim na bringim bek na
serim wantaim kongregesen bilong em.
Em i go long bus stret na stat long painim abus. Em i go i go na em i bungim wanpela laion.
Taim laion i lukim dispela pater, ai bilong em i op bikpela na em i soim sampela tit bilong em na
i laik kaikaim pater.
Pater i pret tru. Tasol em i no laik larim dispela laion bai go fri, nogut em i bai kilim na kaikai
em. Olsem na em i yusim spia bilong em i sutim laion. Em i sutim i go tasol, bikos em i pret
wantaim na han bilong em i seksek olsem na spia i no go stret long laion.
Inap long olgeta spia bilong em i pinis tasol em i no inap kilim laion yet. Laion i wokabaut na
kamap long pater. Pater i tanim na ran i go bek. Em i givim siksti na ran i go. Em i ran na
ran…na laion tu i ran bihainim em.
Nau Pater i kamap long wanpela hap i gat bikpela klif o maunten i sanap stret na i daunbilo.
Sapos em i go yet long ran. Em i bai pundaun i go daun long dispela maunten na i dai.
Em i givap na tanim lukluk long laion i ran bihainim em na i laik kaikai em. Em i lukluk strong
long ai bilong laion na tit bilong em. Dispela i mekim em pret moa yet.
Nau em i no inap painim narapela rot bilong stap seif. Olsem na em i tingting long God na i tok:
“Bipo laion i kaikai mi, mobeta mi mas givim mi yet long God. Mi mas prea long God”.
Em i nildaun, pasim ai, litimapim tupela han bilong em i go antap na wokim prea long God na
askim God long go na helpim em. Em i prea i go i go… na i go……! Em i no pilim olsem laion i
ran i kamap long em. Ples i stap isi tru, i nogat nois. Tasol em i wokim prea i go yet.
Taim em i pinis prea na tok Amen na em i opim ai bilong em na putim tupela han bilong em i go
daun, em i lukim laion tu i pasim ai na apim tupela han bilong em i go antap.
Olsem na pater i askim laion olsem: “Bilong wanem yu no kam, kilim na kaikai mi?”
Laion i putim tupela han i go daun na opim ai bilong em na i tok: “Mi mas wokim prea long Tok
Tenkyu long God bipo mi kaikaim yu. (I say grace before meal).
_______________________________
 Yu save wokim prea bipo long kaikai o nogat (Do you say grace before meal?)
 Prea i save bringim gutpela taim (bel isi) long laip bilong yumi na long laip bilong ol
manmeri i birua wantaim yumi.
 Prea i save helpim yumi long rausim tingting nogut.