OL papamama i mas larim pikinini bilong ol i go long Sande Skul, wanpela senia pasto
bilong Evanjelikal Luteran Sios (ELC) PNG i tok.

Pasto Ainge Jonathan Sande skul i gutpela ples we pikinini i ken save long tok bilong God na
bihainim gutpela pasin.
Em i mekim dispela tok long Bulolo, Morobe Provins taim kongresen bilong em i bung long
opim wanpela elementari skul long Bulolo i no longtaim i go pinis.
Em i tok i gat planti rot em papamama i ken bihainim long lainim pikinini long kamap gut na
wanpela bilong ol rot em long salim pikinini i go long Sande Skul.
Em i bihainim rit long Buk bilong Gutpela Sindaun (Proverbs) 22: 6 we i tok long pasin
bilong lainim pikinini long kamap gut.
Em i tok pikinini yet i no inap lain gut inap papamama i lainim em long pasin bilong skelim
tingting na mekim samting gut.
Pasto Ainge i tok Jisas yet i tok long larim ol pikinini i go long em we i tok long Gutnius
bilong Metyu 19:13-15 we sampela disaipel i pasim ol pikinini tasol Jisas i tokim ol long ol i
mas lusim ol pikinini i go long em.
Jisas i tok, “Larim ol pikinini i kam long mi. No ken pasim ol. Bikos Kingdom bilong Heven
i bilong dispela kain ol lain.”
Pasto Ainge i tok tu olsem 1 Timoti 4: 10-11 i tok long papamama i mas wok hat long skulim
pikinini olsem hop bilong yumi ol manmeri i stap long God na Jisas husat i “Saviour” bilong
yumi.
“Yupela papamama i no ken pasim ol pikinini o lusim ol i stap nating bikos Sande Skul i
gutpela ples bilong pikinini i lain na save long God,” Pasto Ainge i tok.
Bulolo Elementari Skul Kondineta Simaki Gioba i bin gat hevi wantaim mani na ol risos long
statim skul tasol bihain long dispela ol i kisim gutpela sapot long komyuniti.
Dispela elementari i wanpela hap han bilong Sande Skul.
“Husat papamama o manmeri i givim sapot long skul, mipela i tok tenkyu,” em i tok.
“Dispela wokabaut bilong lainim pikinini gut i no isipela rot tasol wantaim strong bilong God
mipela i ken mekim.”
Em i askim manmeri long go het long sapot bilong ol olsem skul i ken go bikpela na moa
pikinini i ken go long skul.
Em i tok skul i wanpela rot bilong helpim pikinini long gutpela sindaun bilong em long bodi
na long spirit, olsem God i yet mekim.