OL PIPEL na Gavman bilong Japan i givim klostu K30 milien bilong ol medikol ikwipmen na
moa long 130 medikol ikwipmen long Papua Niugini long daunim COVID-19 na strongim helt
sekta long kantri.

Embeseda bilong Japan long Papua Niugini, Kuniyuki Nakahara i tok COVID-19 stap yet
olsem birua long PNG taim planti tambu i wok long kamap.
“Olsem na mipela i mas mekim ol samting we i ken strongim wok bilong mipela long daunim
COVID-19.
“Ol medikol ikwipmen we Gavman bilong mi i givim tude em i mak moa long K29 milien.
Dispela mani i kam long grent asistens o helpim mani bilong daunim COVID-19 na strongim
helt sekta. Pot Mobi Jeneral Haus Sik na ol arapela bikpela haus sik long ol provins i ken
yusim ol dispela medikol ikwipmen,” Embeseda Nakahara i tok.
Em i tok tu olsem aninit long dispela helpim mani, Japan i bin givim pinis sampela medikol
ikwipmen long kantri long laspela krismas na tu ol i bai bringim sampela moa medikol
ikwipmen i kam long dispela yia.
“Mi bilip olsem dispela helpim i kam long Japan bai helpim long givim gutpel helt long ol
pipel bilong PNG na pren namel long PNG na Japan bai strong moa,” Embeseda Nakahara i
tok.
Minista bilong Helt Jelta Wong, Seketeri bilong Helt, Dokta Osborne Liko na ol sinia
menesmen bilong Nesenel Dipatmen bilong Helt, Deputi Kontrola bilong COVID-19 Dokta
Paison Dakulala, CEO bilong Pot Mosbi Jeneral Haus Sik Dokta Paki Molumi na ol sinia
menesmen bilong en bin i stap long dispela taim long kisim ol dispela medikol ikwipmen
long han bilong Japan.
“Mipela i tok tenkyu long ol pipel na gavman bilong Japan long kamap gutpela patna bilong
mipela long taim nogut. Em i no namba wan taim Japan i givim helpim long mipela. Ol i bin
stap long PNG bipo long 1975 na ol i go het long helpim mipela.
“Taim COVID-19 i kam long PNG, Japan em i namba wan kantri husat i bin bung wantaim
mipela na helpim mipela long daunim COVID-19.” Minista Wong i tok.

Rebecca Negere i raitim