LONG Alotau, Milen Be Provins yangpela Melissa Veari Gabisini i singaut long helpim bilong komyuniti.

Papa bilong em i sik na i stap long Alotau Jenerel Haus Sik na i nidim blut hariap long seivim laip bilong em.

Melissa i tok, “Mi askim wantaim gutpela bel, yu husat inap helpim mi plis kam long haus sik na givim blut.”

Long Pot Mosbi Jeneral Haus Sik Blut Benk wankain singaut i go aut long ol residen bilong Pot Mosbi.

Hazel Hakalitz Foundation (HHF) i sapotim dispela singaut na i surukim tok olsem sapos yu husat i laik givim blut i mas go long blut benk aninit long wod 6, 7 na 8 long Pot Mosbi Jenerel Haus Sik.

HHF i tok haus sik i sot tru long blut na i askim ol pipel long plis go na givim wanpela o tupela bek blut na seivim laip bilong wanpela.

Ol i tok tu olsem sapos yu tingting long givim blut yum as slip bipo long 10 klok long nait, dring planti wara na kaikai gut pastaim long yu go long blut benk. Na tu yu no ken dring bia long nait bipo.

Wantok Niuspepa i luksave olsem planti arapela haus sik i sot tu long blut na i surukim dispela toksave. Plis go givim blut na helpim long seivim wanpela laip.

Ol mama long haus karim na ol husat I kisim bagarap na I stap long imejensi wod I nidim blut. Plis helpim.