NAMBA bilong COVID-19 keis long Papua Niugini nau i stap long 823 bihain long ripot bilong 4-pela nupela keis long Tunde.

Tupela bilong ol dispela keis i kam long Wes Nu Briten provins na wanpela i kam long Nu Ailan Provins na narapela long Nesenel Kepital Distrik (NCD).

Ol positiv keis long Wes Nu Briten em wanpela meri husat i gat 35 krismas na wanpela mangi i gat 12 krismas. Tupela keis wantaim i no bin soim sain bilong COVID-19 tasol test risal bilong ol i soim olsem ol i gat COVID-19.

Nupela COVID-19 keis long NCD em i wanpela man husat i gat 63 krismas na i save stap long Not Is Ilektoret.

Long Nu Ailan Provins, nupela COVID-19 keis em wanpela man husat i gat 53 krismas na i save stap long Lihir, Namatanai. Ol i luksave long em taim ol i bin mekim kontek tresing.

Olsem na nau COVID-19 keis long kantri i sanap olsem 823 na 9-pela pipel dai.

Long 22 provins long kantri, 16 i gat ol COVID-19 keis pinis. Narapela 5-pela provins Manus, Jiwaka, Simbu, Galp, na Oro i no gat ripot bilong COVID-19 keis yet.

NCD i gat bikpela namba tru, 363 keis. Wes Nu Briten i kamap namba tu wantaim 147 keis.

Tude, 14 Janueri 2021, em i de namba 14 bilong 14-de lokdaun long Wes Nu Briten we Kontrola bilong Nesenel Pandemik na Polis Komisina David Manning i givim.

Ol narapela provins i ripotim ol keis i stap namel long 1 na 30.

Na long wol, ripot i kam long Tunde i soim olsem i gat 664, 574 nupela keis bilong COVID-19 na 11,139 i bin dai long dispela taim.