LONG kirapim wanpela skul wantaim tingting bilong givim kwaliti edukesen, dispela skul i mas redim gut
ol tisa bilong en tu.

Em i mas tingim tu wanem kain kalsa bilong lainim ol sumatin em i laik kamapim long inapim ol sumatin
long lainim samting gut.
Western Pacific University (WPU) em i opim dua bilong en long dispela mun, Janueri 2021. Pastaim long
em inap kamap long dispela mak ol i bin stretim ples, wokim ol haus na klasrum na long wankain taim ol
i bin salim sampela yangpela i go kisim moa trening long inapim ol long kam bek na skulim o helpim ol
sumatin long lainim na kisim gut skul long PNG.
Melanie Jungan wanpela yangpela meri Sepik i bin wanpela bilong ol tripela meri husat i kisim sans long
go skul moa yet long kantri Poland.
Melanie i bin kisim digri bilong em long Divine Word University (DWU) long Infomesen Sistem long 2018.
Em i aplai na kisim spes long wok long WPU na ol i salim em i go skul. Em i stadi long University of
Information Technology and Management long Rzeszow, Poland long kisim Mastas Digri long Kompyuta
Netwok.
Taim em i pinis em bai i kam bek long dispela yia na wok olsem tuta long WPU.
Narapela tupela husat bai i greduet tu long 2021 long dispela yunivesiti long Poland na kam bek tis o
tuta long WPU em Carol Winuan na Priscilla Uramina.
Priscilla i stadi long kisim Mastas Digri long Infomesen Teknoloji wantaim spesel eria em i stadi long en
em Softwe Enjiniaring na Carol Winuan bai i greduet wantaim Mastas Digri long Intenesenel Menesmen.
Carol i amamas tru olsem dispela em i sans bilong em long givim bek long PNG wanem samting em i
kisim long dispela kantri. Em i amamas tu long stap olsem rol model bilong ol yangpela long edukesen.

Rosa Koian i raitim