KLOSTU bai skul stat gen na ol papamama i wok hat tru long painim skul fi bilong ol pikinini husat i
stap long ples na gat bikpela tingting long go bek skul.

“Mipela wokim gaden na salim kaukau, suga, kopi long bungim mani na putim pikinini long skul bikos
edukesen em laip bilong ol bihain taim,” wanpela mama bilong 6-pela pikinini Theresa Petrus i tok.
Dispela mama i gat bikpela plen long laip bilong ol pikinini bilong em taim olgeta i bin statim skul.
“Mi laikim olgeta i mas wok mani na lukautim mi bihain taim bikos long ples mipela i gat kain kain
hevi long sait bilong mekim kastom wok, bungim mani long baim meri, mekim moka na planti moa
samting olsem na wanpela rot tasol em long kisim gutpela edukesen na bihain olgeta i ken kamap
lida bilong komyuniti na apim nem bilong famili long bihain taim,” Theresa i tok.
“Mi gat faivpela pikinini man na wanpela pikinini meri, tasol tupela bikpela man i no painim wok yet
maski tupela i bin greduet wantaim Bachelor Digiri. Olsem na mi pre strong long God i ken givim wok
long tupela hariap na tupela i ken lukautim ol liklik.”
“Mi save lukautim kakaruk, pik, pis na kaukau gaden long kisim mani na lukautim ol pikinini bikos mi
save olsem edukesen em namba wan rot bilong ol pikinini,” em i tok.
Nau em taim bilong olgeta papamama i mas wok bung wantaim long putim ol pikinini long skul bikos
dispela olgeta i ken senisim kantri long bihain taim.

Jacklyn Kimala i raitim