POT MOSBI Jenerel Haus Sik (POMGEN) i sainim wanpela patnasip tok orait wantaim Kidni Faundesen long helpim ol lain i gat sik long Kidni long, 7 Janueri.

Man I go pas long POMGEN Dokta Paki Molumi i tok,“POMGEN i gat ol masin bilong sekim ol sik man tasol nogat man  long wok wantaim ol dispela masin.”

Dokta Molumi i tok ol planti wokman i stap tasol ol i no save gut long wok wantaim ol dispela masin. I gat wanpela wei ol i save rausim olgeta pipia insait long wara na klinim long putim insait long kidni bilong ol man i sik na em i save klinim kidni bilong ol.

“Long mekim ol dispela kain wok mipela i nidim ol man husat i save gut long mekim,” Dokta Molumi i tok.

Dokta Molumi i tok dispeal ol impoten lain i sot long PNG. Na nau ol I kisim helpim bilong Kidni Faundesen long POMGEN na bai helpim wantaim ol masin.

Dispela patnasip em bai helpim ol wokman bilong mipela na ol Dokta long Kidni Fundesen bai wok wantaim na bai helpim. POMGEN i gat Kidni ward pinis bilong putim ol sikmanmeri na helpim ol.

Man i go pas long PNG Kidni Faundesen, Khalik Bin Untong i tok,” Ol bai sekim wanpela sikman 3-pela taim long wanpela wik na klinim ol pipia long blut bilong ol, ol i bai wok wantaim wanpela sikman long 4-pela aua.

Dispela wad i ken lukautim 48 sik man.

Dispela wok  bai stat long Februeri na bai ol sikman i go kisim helpim long Epril.

Kidni Faundesen i sevim PNG long 11 yia nau. Ol bai sanapim wanpela seksen olsem long Hailans long helpim ol lain antap tu Untong i tok.

Ol lain long Kidni Faundesen i gat ensinia bilong ol masin bilong sekim sikman.

Dispela man  bai helpim ol planti wok wantaim ol masin samting.

UPNG Jenelis Sumatin Samnatha Solomon i raitim