KONTROLA bilong Nesenel Pandemik Rispons, David Manning i singaut long olgeta manmeri na pikinini long i go kisim test bilong COVID-19 long dispela yia 2021 long luksave long mak bilong COVID-19 long kantri.

Kontrola Manning i tok ol pipel yet i mas i gat dispela gutpela tingting na laik long i go na kisim test insait long 2021.

Kontrola Manning i tok testing tasol bai tokaut long wan wan manmeri o pikinini sapos ol i gat COVID-19 o nogat na dispela i ken sevim planti laip.

Em i tok em i no wok bilong helt woka long toksave olgeta taim long ol manmeri na pikinini long kisim test, nogat. Tasol em i tok sapos ol manmeri na pikinini i laik sevim laip bilong ol yet, ol famili bilong ol, ol pren na komyuniti bilong ol ol i mas karim ol yet i go na kisim test.

Kontrola Manning i strongim ol pipel long lukluk i go bek long 2020 na wanem ol i bin mekim long abrusim COVID-19 na apim mak bilong abrusim COVID-19 long 2021.