Namba wan de bilong 2021 em i namba wan de bilong 14-de lokdaun na kefiu stat long 10-klok nait i go 5-klok moning long West Nu Briten Provins.

COVID-19 Nesenel Pandemik Kontrola David Manning i tokaut long dispela lokdaun bihain long planti keis bilong COVID-19 i kamap long WNB provins. Dispela lokdaun na kefiu bai pinis long 12-kilok nait long Janueri 15, 2021.

Kontrola Manning i givim ol nupela lo long las wik Fonde bihain long em i kisim ol gutpela tingting long COVID-19 teknikol tim.

“Em i no gutpela long i go insait long lokdaun taim yumi i go insait long 2021, tasol olsem mi save tok olgeta taim, COVID-19 em kam pinis long stap na em bai i no inap givim rispek long yu wanem kain man o kalenda bilong ol samting we bai kamap o ol ektiviti. Olsem na em i bikpela samting long bihainim ol lo bilong helt olgeta taim.

“Dispela em i bikpela samting olsem na mi singaut long olgeta manmeri na pikinini i stap long Wes Nu Briten provins long givim rispek long ol lo i stap pinis long gutpela bilong ol yet. Ol manmeri na pikinini i stap long Is Nu Briten provins i mas rispektim ol lo na i no ken raun i go olsem long West Nu Briten long rot o long solwara. Mipela i toksave pinis long ol kampani bilong ol sip na balus, sapos ol i no bihainim orait lo bilong Pandemik bai mekim save long ol,” Kontrola Manning i tok.

“Olgeta sitisen i mas bihainim ol lo bilong helt long wasim han olgeta taim, stap longwe long narapela, werim mask, stap longwe long ol ples we manmeri na pikinini i pulap long en, na stap long haus sapos i no gat nid long raun. Taim yumi wet yet long ol banis sut we ol arapela kantri i yusim long en, yumi mas bihainim ol lo,” Kontrola Manning i tok.