NUPELA yunivesiti Western Pacific University (WPU) long Sauten Hailans Provins i op dispela yia.

Namba wan lain sumatin bai i stat skul dispela yia. Ol bai i skul long 4-pela program; Visual Communications, Programming, International Management na Advance Networking Technologies.

Ol sumatin bai i stat kamap long Ialibu distrik we WPU i stap long en namel long 19 na 21 Februari. Long Mande 22 Februari i go Tunde 23 Februari em ol sumatin bai i rejista. Long Trinde 24 Februari i go long Fraide 26 Februari ol sumatin bai i kisim orientesen bilong skul.

Skul yia bilong dispela yunivesiti bai i stat long Mande 1 Mas.

Long redim ol tisa bilong dispela yunivesiti sampela yangpela i bin go stadi long kantri Poland na bai ol i kam bek long dispela yia na ol I luk fowot long bungim ol namba wan lain sumatin we ol bai i tisim.