SANTU Benedik kempes (SBC) bilong Divine Word University (DWU) long Wewak, Is Sipik province i bin mekim wanpela bung kaikai bilong ol wokmanmeri bilong em, long Fraide 11 Disemba, long amamasim gutpela wok I kamap long yia 2020.

DWU em i wanpela KatoliK univesiti, olsem Santu Benedik kempes bilong em long Wewak i bin statim dispela de wantaim wanpela bikpela lotu, long tok tenkyu long God papa long lukautim olgeta sumatin na tisa tu, na long givim gutpela tingting na save long ranim skul gut inap pinis bilong yia.

“Maski bikpela sik COVID-19 i bin kamap na i bin kam insait long kantri, Wewak na Santu Benedik kempes i bin stap orait tasol na skul i ran gut, inap pinis bilong yia,” Mista Vincent Sobo, Dairekta bilong Studen Sevis long SBC husat i bin makim maus bilong SBC Vais Presiden, Pater Dokta Lawrence Arockiaraj long dispela taim.

Santu Benedik kempes i bin givim ol misin diwai kros long 193 diploma sumatin bilong em long Misining seremoni long namba 18 Novemba, na i bin go het long greduetim tu, 251 sumatin long 19 Novemba long yia, 2020.

Rachel Shisei i raitim