WANPELA biknem na senia helt dokta  long Isten Hailans i dai las wik.

Dispela dokta em Dokta Leonard Numu Kaupa husat i bin wok olsem sergen o dokat we i save katim ol na stretim ol ol sik manmeri. Bihain tasol long taim kantri i kisim independens long 1975 Dokta Kaupa i bin go na stap wok long Goroka Jeneral Haus sik.

Long komitmen na stail bilong wok bilong em, em i no save laik lukim ol sik lain i go bek long haus wantaim hevi.

“Ol i kam long haus sik long kisim sevis, olsem na mipela ol helt woka i mas givim gutpela sevis long ol,” Dokta Kaupa i save mekim long taim em i bin stap.

“Wok bilong yumi em long sevim ol sikman, meri na pikinini. Dispela em i mas i stap long tingting bilong yumi.”

Wanpela bikpela wok Dokta Kaupa i bin kamapim em long kisim Operesen Open Hat (OOH) i go long Goroka haus sik long 1990.

Bihain long dispela Helt Dipatmen i kisim OOH i go long Pot Mosbi.

Aninit long lukaut bilong em long kamapim OOH na ol arapela operesen, em i sevim planti laip na i givim seken sans o namba tri sans long laip bilong ol sik manmeri na pikinini.

Bikos long dispela em i bin suruk i go antap long level bilong ekting Sif Eksekutiv Opisa bilong Isten Hailans Provinsal Helt Atoriti (EHPHA).

Dipatmen bilong Helt long wankain taim i bin makim em long kamap Deputi Sif Sergen bilong Hailans rijon.

Wantaim dispela Dokta Kaupa i bin givim trening long planti ol helt ekstensen opisa (HEO), nes na ol arapela helt woka husat i save wok long sait bilong operetim ol manmeri.

Nupela Helt Seketeri Dokta Osborne Liko i wanpela long ol dokta em Dokta Kaupa i bin trenim.

“Mi amamas na tok bikpela tenkyu na salut i go long Dokta Kaupa husat i helpim tu long givim mi gutpela trening,” Dokta Liko i tok.

“Dispela trening i bringim mi i kam antap long dispela level olsem helt seketeri.”

Sif Eksekutiv opisa bilong EHPHA Dokta Joseph Apa i tok long painim kain wokman olsem Dokta Kaupa em bai hat.

“Mipela ol menesmen bilong EHPHA na Goroka Provinsal Haus sik i mas tok amamas na tenkyu long Foe traib na ol pipel bilong Nambayufa, Siane na Chuave long Simbu provins long givim mipela dispela pikinini man bilong ol,” em i tok.

“Dokta Kaupa i bin mekim planti gutpela wok long Isten Hailans inap long taim em i dai.

“Em bai hat long painim kain wokman long go insait long su bilong em.”

Long taim Dokta Kaupa i stap na wok yet long Goroka haus sik, Helt Dipatmen i luksave long gutpela wok bilong em na givim nem bilong em i go long wanpela wing bilong Goroka haus sik “Dr Leonard Kaupa Wing”.

Sape Metta i raitim