KUMUL Petrolum Akademi (KPA) save trenim na givim gutpela skul tok long ol human risos bilong Papua Niugini wantaim wol klas edukesen na ol teknikel kwalifikesen na painim wok bilong ol sumatin taim ol i greduet long institusen, wanpela opisa (official) i tok.

Menejing Dairekta bilong Kumul Petrolum Holdings Limited (KPHL), Wapu Sonk i mekim dispela toktok long namba tri greduesen seremoni bilong KPA institusen long Idubada Teknikal Koles long Pot Mosbi las wik.

Inap long 19 sumatin KPHL na Oil Search Limited i sponsa long skul na ol i greduet.

Sonk i tok KPA skul i gat wol klas trening fesiliti we ol sumatin trening long dispela hap i save lainim ol samting olsem hap bilong ol ikwipmen na masin we ol kampani long oil na gas indastri sekta i yusim long ol plent sait.

Em i tok institusen tu i save kisim ol trena husat i gat bikpela teknikel save long trenim ol wok manmeri bilong oil na gas indastri sekta insait long ol biknem kantri.

Ol bikpela kantri olsem Amerika i save kamapim tu ol wel na gas projek.

Papua Niugini i gat Hides gas (Hela) na Kutubu oil (Sauten Hailans).

“Kumul Petrolum (KPHL) i yusim US$4 milien dola (K12 milien) long sanapim dispela trening fesiliti.

Dispela fesiliti tu ol i konektim wantaim ol sistem wankain olsem dispela yu lukim long Kutubu, Moro, Gobe na Hides plent sait.

“Ol sistem i luk wankain na yu ken gat wankain pilim.

“Long  hia mipela trenim ol sumatin bilong mipela long ol i mas gat strongpela tingting long mekim wok.

“Ol sumatin i lainim gutpela pasin na redim ol yet long go stret long wok.

“Wantaim dispela trening mipela kisim long ol indastri em i bikpela samting na mi lain gut.

“Dispela i wanpela bikpela senis mipela i kisim long laip bikos pastaim mipela i no save liklik long wanpela samting tasol nau mipela i save long kain senis wel na gas indastri i ken kamapim long laip bilong mipela.

“Dispela i ken helpim mipela tu long painim gutpela wok long ol arapela sekta.”

Willie Brul i raitim