Yia 2020 i bin wanpela hatpela yia tru bilong edukesen wantaim hevi bilong coronavirus. I bin i gat tupela lokdaun aninit long stet ov imejensi bilong COVID-19 pandemik na ol sumatin i kisim hevi long taim ol skul i pas na ol tisa i no bin redi no dispela hevi.

Taim namba wan COVID-19 keis i bin kamap long Lae Praim Minista James Marape i bin pasim kantri. Long 2-pela wik lokdaun olgeta bisnis na wok I pas. Planti manmeri i no gat hap long wok na kisim mani. Ol famili i painim hat long kaikai.

Ol skul i bin kisim hevi taim ol i no go bek long klas. Tasol ol I mas lainim hariap sampela nupela pasin.

Ol i putim ol wara tenk na ples bilong wasim han. Ol i skelim ol klas na mekim nupela skedul bilong skulim ol pikinini.

Sampela i skul wantaim tisa tupela de na narapela tupela de ol i stap long haus na mekim asainmen, na narapela grup i skul 2-pela de wantaim tisa.

Ol tisa tu I mas lainim hariap sampela nupela pasin bilong skulim ol pikinini.

Ol skul i bin pas na COVID-19 i pusim sampela yunivesiti na sampela skul long yusim intanet long skulim ol sumatin. Ol tisa bilong ol i lainim ol long ‘google i klasrum’ na ‘zoom’. Na tu ol hai skul na praimeri sumatin i yusim ol kompyuta samting bilong skul long intanet wantaim ol onlain skul wok.

Long yusim intanet long mekim skul wok ol sumatin i nidim mani long baim data. Dispela em i mekim ol papamama i lusim moa mani antap long skul fi.

Sampela papamama i painim hat tru long baim ol kain samting olsem mobail fon na leptop bilong ol pikinini bilong ol husat i stap long hais kul na praimeri skul. Ol prais bilong ol i bikpela tru. Na tu ol sumatin long yunivesti sampela i no save long wok wantaim onlain klas.

Dispela i bin mekim ol i kisim ol mak i aninit long pas mak bilong go long neks level bilong skul.

Wanpela bikpela impek bilong COVID-19 em bikpela namba bilong gred 12 sumatin long PNG i no kisim wanpela ples long ol yunivesti na koles bilong long kantri. Moa long 17,000 gred 12 sumatin i no stap insait long seleksen lista bilong 2021.

Nupela Minista bilong Edukesen na memba bilong Usino Bundi Jimmy Uguro i tok, “Wanpela man i no mekim dispela, em samting i kamap long olgeta hap bilong dispela graun.”

Long stat bilong yia, 2020 Nesenel baset gavman i bin makim sampela mani bilong helpim ol sumatin long haia edukesen.

Long edukesen baset gavman i givim K60 milien long helpim ol sumatin husat i no inap long baim skul fi bilong ol long koles na yunivesiti.

UPNG Jenelis sumatin Samantha Solomon i raitim