MANANDA sab-helt senta em i wanpela liklik haus sik long Hela provins we i save helpim 15,903 manmeri na pikinini long Manada na Komo distrik. Ol namba wan misinari i bin wokim dispela haus sik long 1962 na em i stap long 68 krismas nau.

Insait long Mananda yet, haus sik i save helpim moa long 5,000 manmeri na pikinini.

Ol manmeri na pikinini i save wokabaut long longpela rot na kalapim planti maunten long kam long dispela liklik haus sik.

Bethy Maga, wanpela lokal nes opisa i givim lewa na taim bilong em long wok long dispela haus sik long 34 krismas nau. I gat 4-pela nes i save helpim Bethy long wok long haus sik. Na krismas bilong olgeta i stap long 50-60 krismas.

Bipo long taim bikpela guria i no bin kamap yet, haus sik i bin gat tupela haus. Aut pesen na haus bilong karim bebi.

Long 2018, taim bikpela guria i bin kamap, dispela tupela haus i pundaun long graun.

ExxonMobil i bin lukim dispela na i givim han na sanapim bek wanpela haus. Nau dispela haus i wok long sevim ol pipel long Mananda.

“Mi tok tenkyu tru long ExxonMobil long sanapim bek haus sik. Em i bikpela samting tru long ol pipel long Mananda. Tenkyu ExxonMobil,” Sista Bethy Maga i tok.

Em i tok moa olsem haus sik i nidim moa wanpela haus bilong ol mama long karim bebi. Em i tupela krismas nau na haus sik i no helpim ol mama long karim bebi bikos i no gat haus karim. Ol mama i save karim bebi long ples tasol na dispela i no seif.

Betty na 4-pela wokmanmeri bilong Mananda Sab Helt Senta i no save kisim pe bilong ol.

“Mi askim strong gavman long lukluk long dispela hevi bilong pei bilong mipela na stretim. Mipela i no save kisim pe bilong mipela, tasol dispela i no pasim mipela long sevim ol pipel. Helt bilong ol pipel bilong mi em bikpela samting tru,” em i tok.

Em i tok haus sik i save kisim K3, 000 tasol long gavman long wanpela yia, na dispela i no inap long ranim haus sik long wanpela yia.

ExxonMobil i bin givim sampela ikwipmen na marasin tu long haus sik long taim bilong COVID-19 na long taim guria i bin kamap.

Bikos long bikpela namba bilong ol pipel long Mananda, haus sik i nidim moa helpim.