EM i krismas taim nau na ol sik manmeri na pikinini long Hela Provinsal haus sik i amamas bikos ol i kisim ol presen bilong helpim ol long taim ol i stap long haus sik.

ExxonMobil i bin amamas long givim ol presen olsem bisket, dring, blanket, baket, sop na taul long ol sikmanmeri na pikinini.

Dispela em i strongim wokbung namel long ExxonMobil na Hela Provinsal haus sik.

“Mipela i laki tru olsem ExxonMobil i kam long haus sik bilong mipela na givim dispela ol presen long ol sikmanmeri na pikinini. Long makim olgeta wokmanmeri bilong Hela Provinsal haus sik, mi tok tenkyu na lukluk  long moa sapot i kam long kampani,” Dairekta bilong ol Nes long Hela Provinsal Helt Atoriti, Freda Makanda i tok.

Antap long dispela ol presen, kampani i bin sanapim wanpela sterelaisesin haus na i putim tupela sterelaisesin masin o masin bilong klinim ol ikwipmen bilong haus sik.

Dispela em i wanpela rot we kampani i bihainim long helpim ol komyuniti long Hela.

“Mi tok amamas tru long ExxonMobil long bikpela wok em i mekim long haus sik. Bikos long dispela tupela nupela masin, mipela i ken klinim ol ikwipmen bilong yusim long haus sik na mekim ol operesin,”Provinsal Dairekta bilong medikol sevis Dokta Tana Kiak i tok.

Dokta Kiak i tok moa olsem kampani i bin helpim tu haus sik long taim bilong COVID-19. Em i tok haus sik nau em i stap long level 5 na i save helpim 200 sikmanmeri na pikinini long wanpela de.

Ol i save sapotim tu ol liklik etpos insait long provins tu.

Spes bilong lukautim ol sik manmeri na pikinini long haus sik em i wanpela salens we haus sik i gat nau. Haus sik i nidim moa spes bikos namba bilong ol sik manmeri long Hela em i antap tru.

Carolyne Ketsimur i raitim