MADANG Katolik Asbisop Anton Bal i gat bikpela hevi long edukesen sistem long provins.

Em i tok edukesen sistem i wok long rausim planti ol sumatin i go aut long sistem long wan wan yia na i no painim rot long helpim ol.

Em i tok Madang provins i sindaun antap long ‘taimbom’ we i wetim taim tasol long planti sosel hevi long kamap.

Long 2019 samting olsem 8000 gret 8 sumatin i bin sindaun long Gret 8 eksam.

Long dispela namba 4000 i pas na i go het long haiskul na narapela hap i no gat.

Asbisop Anton i mekim dispela tok bihain long em i go aut long ol ples long Madang na i lukim ol liklik meri i wokabaut wantaim ol pikinini long sait bilong ol.

Em i ting dispela ol bebi ol i karim susa bilong ol tasol samting tru em ol pikinini bilong ol.

Tasol nogat. Em ol pikinini bilong ol i wokabaut wantaim ol.

Antap long en tu planti ol yangpela meri na man i wok long kamapim ol pikinini taim ol i stap yangpela tumas na i no redi long lukautim ol pikinini na ol papamama na ol tumbuna i wok long hatwok long lukautim.

Dispela em sosio-ekonimik hevi we Edukesen sistem i kamapim long Madang provins bikos ol lida long provins i nogat gutpela plen long wok bung wantaim ol saveman bilong Edukesen Dipatmen long Madang.

 na Waigani kamapim gutpela wok-mak o visin o plen bilong helpim Madang provins long sait long Edukesen na human risoses bilong en long bihain taim.

Hevi em olsem i no gat spes long ol skul long kisim moa long 4000 sumatin bilong lowa praimeri skul long go mekim gret 9 bikos nogat spes long klasrum.

Katolik Edukesen ejensi long Madang luksave olsem kamapim wanpela moa sekenderi skul bai helpim tru Tusbab Sekenderi skul long Madang taun wantaim bikpela hevi long em i gat tude, we insait long wanpela klas i save gat namel long 80 na 100 sumatin.

Em i tok Katolik Sios i luksave long wanpela eria klostu long Holi Spirit praimeri skul na i gat tingting long wokim kamap wanpela sekenderi skul, tasol planti kain kain toktok i kamap olsem sampela lain i laik wokim wanpela kasino o hotel long hap.

Asbisop Anton i tok em i no wari long hotel tasol hevi bilong sumatin i go aut na stap nating bai givim ol bikpela hevi.

Dispela em bikpela hevi tru na i no go wantaim stendet bilong PNG o Yunaited Nesens long wanpela tisa i mas lukautim sumatin mak em 30 na daunbilo.

Wantok Niuspepa i bin laik kisim toktok bilong ekting Edukesen Edvaisa long Madang, John Sigara long dispela tasol no inap.

Tasol wanpela senia edukesen opisa long Madang i tokaut olsem wanem wari em Katolik Edukesen ejensi i autim em trupela tok.

Madang provins i no gat inap sekenderi skul long kisim namba bilong ol lowa praimeri skul husat i pinisim gret 8 tasol.

Narapela stori nogut bilong Madang provins em akademik stendet bilong olgeta sekenderi na haiskul insait long Madang provins i pundaun i go daun tru namel long olgeta arapela skul insait long PNG.

Ekting Edukesen Dairekta bilong Madang, John Sigara i tokaut long dispela long las wik taim em i mekim toktok long greduesin bilong Madang Tisa Koles.

Mista Sigara i tokaut olsem insait long rekot bilong Nesenel Edukesen Dipatmen (NDOE) ol sekenderi skul na haiskul long Madang provins i no stap insait long top ten o top 20 mak long sait bilong gutpela mak long ol sabjek em ol sumatin i lainim long em.

Level bilong ol skul long Madang i stap ausait long top 10 na top 20 na dispela i no gutpela mak.

James G. Kila i raitim