BANK South Pacific(BSP) i givim mani mak olsem K15,000 long PNG Human Resource Institute(PNGHJRI).

 BSP i givim dispela mani long helpim PNGHRI long holim wanpela liklik konfrens bilong em.

Dispela konfrens i kamap long Fonde  17 Desemba. Man husat i go pas long lukautim ol wokman bilong BSP Ray Baloiloi i tok  ol i save long wanem hevi ol  i save bungim long lukautim ol wokman.

“Lukautim ol wokman insait long wok ples em i namba wan samting long mekim” Baloioi i tok. Em i tok moa olsem taim yumi wokim poroman wantaim ol dispela lain olsem PNGHRI em bai i helpim mipela long kisim tok skul long rot bai mipela i lukautim ol wokman bilong mipela.

Vais presiden bilong PNGHRI Raymond John i kisim dispela sek, em i tok amamas na tenkyu i go long BSP long olgeta yia ol i save helpim PNGHRI.

Mista John i tok moa olsem “tru sik COVID-19 i bagarapim ol bisnins na nomol wok  tasol yupela i no lus tingting long helpim PNGHRI, dispela i strongim relesensip bilong BSP na PNGHRI moa yet.”

Long dispela liklik konfrens bilong ol PNGHRI, moa long 80 manmeri  bai i go long makim maus bilong wan wan oganaisesen . Het tok bilong dispel bung em 2020 Global Human Capital Trends.

Long  dispela bung bilong PNGHRI, ol sampela tim bilong BSP bai i stap long hap long helpim  ol lain husat i gat hevi wantaim Wantok Delite prodak.

UPNG Journalism Sumatin Samantha Solomom i raitim