BOWALI Praimeri skul insait long wanpela rural hap bilong Papua Niugini i bin holim namba 18 Gret 8 greduesen bilong ol long Lae, Morobe Provins long las wik Trinde.

Dispela greduesen de i bin kamap gut wantaim amamas bikos het bilong skul Mista Allan Apuahe i bin tokaut long gutpela ansa na apim nem bilong ol sumatin na tisa wantaim long mekim bikpela hatwok inap skul i bin pas.

Het tisa Mista Allan Apuahe i tok, “Maski COVID-19 tasol ol tisa na sumatin i no bin pret o suruk long dispela sik tu na olgeta i go het wantaim edukesen na pinisim dispela yia wantaim greduesen selebresen.

Em i tok bikpela tenkyu long ol Bod memba, komiti, LLG na sios long wok bung wantaim olsem patnasip na strongim wok bilong edukesen sevis insait long wan wan ples bilong ol.

“Taim mi bin kam long 2003, mi lukim dispela skul i bin bagarap na no gat gutpela sapot bilong olgeta lain na planti hevi i bin daunim mak bilong skul tasol nau em bikepla senis kamap na stopim ol pasin no gut na stap wanpela olsem Yanga, Wakang, Begesin, Malahnag, Hanta, Busurum, na Busu Kompaun bikos dispela em wanpela rot bilong bringim bel isi na rispektim raits bilong ol pikinini long edukesen na God bai blesim yumi olgeta,” em i tok.

“Mipela i gat 30 tisa, 126 gret 8 sumatin tasol COVID-19 mekim na 96 gret 8 tasol i bin greduet long dispela yia,” em i tok.

Het tok bilong namba 18^th Greduesen em long kamap “Best and Improves Standard of Living Through Reformed” na ol bai enrolim 366 Early Child Hood neks yia, 2021, Gavman i bin sapotim ol wantaim mani mak K51, 854 64, long helpim ol ranim dispela program insait long skul.

“Mipela i gat moa long 810 praimeri skul pikinini olsem na mi lain tok tenkyu long papamama long oltaim sapotim pikinini bilong ol long skul,” em i tok.

Mista Apuahe i tok plen bilong 2021 em long pinisim nupela klasrum bilong ol gret 8 wantaim sapot bilong Bod Siaman bilong skul Tawas Nasingom na ol komyuniti long wok bung wantaim na bringim nupela divelopmen i kam insait long skul bikos dispela i ken helpim edukesen bilong ol pikinini.

Paulus Tali i raitim