MEKIM manmeri i stap gut na amamas i bikpela samting long wanpela, Faunda bilong Niu Litresi Kolis, Nana Nathalie Tom long 9-Mail ausait long Pot Mosbi i tok.

Em i mekim dispela tok long greduesen bilong ol elementeri sumatin long skul bilong em long las wik.

Tom husat i bilong Madang na Simbu na i singel mama bilong tupela pikinini i tok em i bikpela presen moa taim yu helpim manmeri long rit na rait.

Em i tok em i bin painim hat taim em i lukautim tupela bikpela pikinini wantaim nogat sapot bilong man.

Em i tok sindaun bilong sosaiti i senis we ol manmeri i lukluk long helpim ol yet na i no helpim ol arapela manmeri husat i stap klostu long ol o insait long sosaiti.

Em i tok em i statim Niu Litresi Kolis long helpim ol pikinini husat i raun nating long 9-Mail.

“Taim yu helpim manmeri long rit na rait, yu opim rot long laip bilong em,” Tom i tok.

“Wantaim save em i gat, em i ken mekim wanem samting em inap long mekim.”

Tom i askim ol sumatin husat i greduet long ol i mas go moa yet long skul bilong ol.

Em i tokim ol sumatin olsem long ol i pinisim elementeri skul dispela i stat bilong skul bilong ol.

Em i tok wanem samting bai kamap 10-pela o 15 yia bihain, dispela ol i no inap save.

Em i tok bikpela samting em ol i mas go het yet long skul inap long taim ol i pinisim skul bilong ol.

Em i askim ol papamama long strongim ol pikinini na givim gutpela sapot long wokabaut bilong ol long skul laip bilong ol.

Inap long 40 sumatin i greduet long Niu Litaresi Kolis na ol bai skruim skul na mekim Gred 3 long Niu Erima Praimeri Skul long neks yia.

Willie Brul i raitim