YUMI mas sanap bung-wantaim na promotim awenes bilong sik HIV/AIDS insait long wan wan komyuniti bilong yumi long banisim sik long kamap.

Dispela em wanpela strongpela toktok wanpela menesa bilong nikel/kobalt maining kampani long Madang provins, Michael Guo i mekim taim kampani i givim 30 siot i go long Katolik Helt Sevis long Madang long helpim program bilong ol long Wol AIDS De we i bin kamap long Disemba 1, 2020.

Ramu NiCo (MCC) em wanpela bikpela kopret ogenaisesin tasol long Madang husat i givim han long helpim ol lain bilong Katolik Helt Sevis long kamapim flot o awenes egensim sik HIV/AIDS.

Meri i go pas long redim Bethany VCT Senta, Elizabeth James i tok bikpela tenkyu i go long Ramu NiCo (MCC) bikos em wanpela kampani tasol husat i luksave na givim sapot long mekim kamap program bilong ol i kamap gut.

Elizabeth i tok ol i raitim pas i go long planti ol bisnis haus long Madang long helpim ol long luksave long Wol AIDS De long kamapim awenes, tasol nogat ol arapela bisnis haus i givim gutpela bekim.

MCC tasol i bekim pas insait long las minit stret.

Em i tok ol i salim pas long taim yet pastaim long program bai kamap tasol nogat gutpela bekim i kam. MCC i kisim pas long Sarere tasol, na long Mande em i bekim na Tunde emWol AIDS program i kamap na ol lain long Bethany VCT Senta na Katolik Helt Sevis i amamas na tok tenkyu long gutpela luksave bilong Ramu NiCo (MCC).

Mista Guo i tok MCC em kopret sitizen bilong Madang na em i amamas long wok wantaim ol pipel long promotim gutpela pasin na tu gutpela helt insait long komyuniti bilong Madang na PNG.

Em i tok MCC i save sanap bihainim hettok o moto bilong kampani em ‘Wan Ramu NiCo, Wan Komyuniti” bikos em i stap long Madang na i laik wok moa klostu wantaim ol pipel long divelopim Madang provins na PNG olsem wanpela komyuniti.

James G. Kila i raitim