JIWAKA edukesen edvaisa Dr. Charly Muke i laikim olsem ol sumatin husat i bin greduet
long gret 8, 10 na 12 insait long provins i mas no ken lusim tingting long edukesen bilong ol.

Em i tokim moa long 300 gret 10 na 12 sumatin bilong Waghi Valley Sekenderi Skul long
greduesen bilong ol las wik Fonde, olsem edukesen em laip.
Olsem bosman bilong edukesen long provins, em i askim olgeta yangpela long no ken lusim
hop taim ol i no kisim wanpela spes long gret 9, 11 o  yunivesiti na koles.
"Stori bilong mi i olsem: papamama bilong mi em ol ples lain stret.
"Taim bilong mi em hatpela tru na i no wankain olsem nau long taim bilong yupela. Maski
planti hevi na wari, mi no bin lusim skul.
"Mi greduet long tisa koles na kamap tisa. Bihian mi aplai long yunivesti insait long kantri
tasol mi no winim wanpela spes.
"Sikistin taim mi aplai long ol yuni tasol mi no laki.
"Dispela i no mekim mi wari o daunim mi. Mi traim i go na las minit tru mi winim wanpela
skolasip long go stadi long New Zealand.
"Bihian mi stadi long masta program na wokim tisis na kisim dokta ov pilosopi (PhD) digri.
"Mi bin tis planti krismas long ol yunivesti long Australia olsem leksera. Olgeta pikinini
bilong mi i skul long Australia na ol i wok long hap nau.
"Laip em i gutpela tru long hap (Australia) tasol mi tingim Jiwaka na kam bek," Dokta Muke
i tok.
Em i tokaut long astingting bilong em long kam bek na kisim posisen bilong provinsel
edukesen edvaisa (PEA).

"Standet bilong edukesen long Jiwaka em i daunbilo tru. i gat planti risen wai stendet i go
daun. Wanpela risen em i korapsen.
"Korapsen long apoinmen bilong ol tisa na braiberi i bagarapim edukesen sistem bilong
provins.
"Gavana bilong yumi Dokta William Tongamp i laikim mi long stretim dispela hevi.
"Nambawan em mipela bai mekim na olgeta tisa insait long provins mas go long inspeksen
stat long neks yia (2021).
"Nogat inspeksen i bin kamap olsem na ol planti gutpela tisa i lusim provins na i bin go aut.
"Na tu tisa motivesen i no stap bikos nogat inspeksen. Ol tisa tis long kisim promosen. Sapos
nogat inspeksen, ol i no tis gut.
"Mipela i gat nid long wokim ol infrastraksa bilong ol sekenderi skul bilong mipela wantaim
gutpela laiberi, saiens laboteri, domitori, haus tisa na givim mani pawa i go bek long ol
edministresen long wokim ol projek long impruvim tisin na lenin," Dokta Muke i tok.
Em i tokaut long plen long mekim Minj sekenderi skul na Pater Peter Fatima sekenderi skul
kamap skul ov ekselens.
"Bikpela samting tru mi laik tokim yupela ol sumatin we i greduet nau i olsem.
"Baibel long Gutpela Sindaun 4:13 i tok olsem edukesen em laip na yumi mas lukautim em
gut tru olsem wanpela kiau.
"Edukesen em wanpela rot we i nidim sekrifais na komitmen long sait bilong yumi yet na ol
papamama, tisa na olgeta stekolda.
"Edukesen na gutpela tingting em save kam long papa God wanpela tasol, olsem na yumi
mas no ken lusim God.
"Skul em i ples we yumi kam bilong lainim ol gutpela samting na luksave long plen bilong
God long laip bilong yumi.
"Lukautim edukesen bilong yupela gut na bai yupela i gat gutpela sindaun long bihian taim,"
Dokta Muke i tok.
Skul prinsipel Betty Wena i tok tenkyu long Dokta Muke wantaim ol invaitet ges we i kam
givim gutpela skul tok long ol gret 10 na 12 sumatin, papamama na tisa wantaim.
Waghi Valley sekenderi em i wanpela ejensi skul bilong Evangelical Brotherhood Church
(EBC).

Hoffman Gulgarye i raitim