BUSU Sekenderi skul i bin holim namba 14 Greduesen bilong ol long las wik Fonde long Lae, Morobe Provins.

Dispela greduesen seremoni i bin bungim olgeta papamama long olgeta hap insait long Lae siti na ol arapela provins wantaim tu, long lukim ol pikinini bilong ol kisim gutpela Akedemik mak na kisim prais.

Het tok bilong dispela spesel de long Busu Sekenderi i bin sanap olsem “Knowledge and Christian Values the Foundation of Life  long Lainim. Dispela i namba wan rot bilong kisim kwaliti edukesen na go het wantaim edukesen mak bilong ol sumatin husat i gat bikpela driman long baihain tiam bilong ol.

Ol bikpela lain husat i bin kamap lukim dispela spesel de em; Provinsal Program Edukesen Edvaisa bilong Morobe Keith Tangui na ol arapela prinsipal bilong sekenderi skul long Lae siti husat i bin kamap long dispela em de Malahang Teknikol Sekenderi Skul, Lae Sekenderi, Bumayong Lutheran Sekenderi, Markham Valley Sekenderi na ol provinsal Edukesen Het.

Provinsal Program Edukesen Edvaisa bilong Morobe Gavman Keith Tangui i bin tok tenkyu long prinsipal bilong Busu Sekenderi skul, Mista George Noble na Deputi Samba Lames, Deputi Akedemik na ol wok manmeri bilong skul long soim trupela kala na pasin bilong wok bung wantaim na lukim kaikai bilong Namba 14 greduesen.

“Mi laik makim maus bilong Morobe provins na laik givim kredit long yupela olgeta wok manmeri bilong Busu sekenderi skul, long gutpela yuniti wok,” Mista Tangui i tok.

“Mi amamas long Bod Siaman Rev Erik Punde na ol Bod memba husat i bin wok bung wantaim ol bod kaunsil na ol wok manmeri long mekim dispela gredusen de bilong ol 265 sumatin i kamap gut,” em i tok.

Em i tok dispela em bikpela namba bilong ol sumatin long dispela yia na putim gutpela rekot long skul olsem na stopim pasin sanguma, kalt na ol pasin nogut na wok bung wantaim long bringim skul i go antap long narapela mak.

Long dispela greduessen wanpela sumatin meri Eunice Baput husat i bin Sains Awot bihain long hatwok bilong em long skul olsem na papa bilong em Mista Baput i bin amamas long pikinini bilong em.

Papa bilong Eunice i no bin bilip olsem pikinini bilong em bai kisim awot tasol pikinini amamasim em wantaim ai wara olsem na bikpela tenkyu long Papa God long lukautim pikinini bilong em long skul.

Eunice Baput i bin tok tenkyu long papamama bilong em long sapotim em olgeta taim long skul taim em nidim samting long skul, olsem na wanpela rot bilong mekim tupela amamas em kisim Awot long gredusen taim.

“Mipela mas tingim God long olgeta skul wok bilong mipela na tu pas wantaim em long prea olgeta taim bikos em tasol i rot bilong laip na olgeta samting bilong dispela graun,” em i tok.

Paulus Tali i raitim