LONG Mande, 23 Novemba 2020, long apinun, long Sir Peter Barter auditorium bilong Divine Word
University (DWU), i bin i gat miting o pasin bilong senisim Presiden bilong DWU.

Olpela presiden Profesa Cecilia Nembou ODE i givim dispela wok long nupela presiden Pater Profesa
Philip Gibbs, SVD OBE.
Bihain long ol i singim Nesenel Antem bilong Papua Niugini, Asbishop Douglas Young SVD DD, siaman
bilong DWU Kaunsil i welkamim olgeta manmeri husat i kam witnesim dispela senis na bihain em i
givim bikpela tok tenkyu na amamas long ol bikpela wok presiden, Profesa Cecilia Nembou i bin
wokim long taim bilong em.
Profesa Nembou i bin mekim wok olsem presiden long 5-pela yia olsem lida bilong DWU long
Madang wantaim ol kempus bilong DWU long Wewak, Rabaul na Pot Mosbi.
Trupela na gutpela pasin bilong senisim presiden i kamap taim olpela Presiden, Profesa Cecilia
Nembou, i givim long nupela presiden, Pater. Profesa Philip Gibbs, Komon Seal bilong Yunivesiti, em
mak bilong pawa bilong lida.
Bihain long dispela, nupela presiden i mekim tok antap tru (Oath of Office) long ai bilong memba
bilong Yunivesiti Kaunsil, Jastis Nicholas Kiriwom, na ol i putim long em ol klos bilong Presiden.
Asbisop Douglas Young SVD DD i tok long bikpela amamas bilong em long pasin bilong senisim
presiden i kamap wantaim pasin rispek na bel isi. Em i tok, em i no lukim kain gutpela pasin long
planti narapela ogenaisesen na ol kantri. Em i tok, planti taim ol lida i strong long holim pawa na
senis i save kamap wantaim kros na pait. Em i tok Divine Word University i ken kamap eksampel long
ol narapela ogenaisesen.