Moa long 90 helt woka long Morobe Provins i pinisim prektikol trening bilong ol long apim
wok bilong banis sut long provins na daunim ol sik we i save nidim banis sut.

Ol dispela helt woka i apim save bilong ol long givim banis sut na menesim ol saplai na ol
samting taim ol i karimaut banis sut autris. Dispela bai helpim ol long daunim ol sik, disabiliti
na dai we banis sut tasol bai daunim long en olsem polio, misels, tetanus na ol arapela.
Ol samting ol i lainim i stap aninit long het tok kol sen menesmen bilong lukautim gut ol
banis sut, stretim na lukautim ol autris program na sefti bilong banis sut.
Brenda Tanz, nesing opisa na sista husat i lukautim Wantoat Helt Senta long Makam Distrik i
tok dispela trening i opim save bilong em long banis sut.
“Bai mi go bek long distrik bilong mi na mekim planti awenes long banis sut na putim long
prektis wanem mi lainim long helpim ol pikinini long ples,” Sista Tanz i tok.
Dispela trening i kamap aninit long PNG Gavman malti-yia nesenel banis sut plen na
Accelerated Immunisation Health System Strengthening program.
Dispela program em tingting bilong Gavman bilong PNG, gavman bilong Australia na Nu
Silan i sapotim na Gavi – Vaccine Alliance tu i sapotim.
Ol i kisim sampela teknikol sapot long World Health Organization (WHO) na UNICEF na ol
provinsal helt atoriti na ol arapela ogenaisesen olsem World Vision.
Ekting Helt Dairekta bilong Morobe Provins Micah Yawing i tok em i bikpela samting long ol
pikinini i mas kisim banis sut.
“Mipela i mas luksave na inapim ol saplai bilong banis sut bai olgeta komyuniti i kisim
helpim,” Mista Yawing i tok.
Dispela banis sut program i gat bikpela tingting long givim banis sut long moa long 415,000
bebi long PNG taim 2022 i kamap.
Dispela wankain trening i kamap tu long Westen Provins na Madang Provins.