INSAIT long ol ripot long ovasis i gat nupela o narapela raun coronavirus i kam bek gen.

Long Saut Australia las wik ol i bin pasim hariap tru ol skul, ol sios na ol arapela pablik hap inap sikispela
de bihain long ol i kisim toksave bilong nupela raun bilong coronavirus. Bihain long dispela ol bai i stap
yet long narapela etpela de tambu.
Ol ripot long Australia i tok insait long dispela lokdaun ol i tambu long ol seremoni bilong marit na indai i
no inap kamap long dispela taim.
Long Amerika namba bilong indai i kamap long coronavirus i sut i go antap tru. Nau namba i abrusim
pinis 250,000 indai na i go antap yet.
Ol ripot i tok ol i opim ol skul long etpela wik tasol na ol i mas pasim gen bihain long dispela bikpela
namba bilong indai.
Ol piksa tu i soim olsem ol haus sik i pulap tru na i no gat spes na ol i mas putim sampela sikmanmeri
wantaim coronavirus long kapak bilong haus sik.
Long Itali nois bilong ambulens em i kisim olgeta spes long win pinis. Long mun Novemba ol i lukim
10,000 indai pinis na dispela namba i gro yet.
Ol ripot i tok long Yurop insait long 17 minit wanpela i save indai long coronavirus.
Tasol ol pipel i no wari moa. Hevi bilong lukautim ol famili i kamap bikpela moa nau taim papamama i no
gat moa wok na ol i painim hat long lukautim famili.
Long planti hap bilong wol ol famili i amamas long welkamim krismas tasol tok lukaut i kam long sampela
lida long bihainim ol protokol bilong banisim coronavirus.
WHO i tok krismas bai i no wankain olsem bipo tasol ol pipel i mas was long dispela sik nogut olgeta
taim.

Rosa Koian i raitim