USINO praimeri skul long Usino-Bundi distrik bai kamap namba wan teknikol haiskul long Madang provins long 2021.

Vais Minista bilong Maining na Memba bilong Usino-Bundi, Jimmy Uguro i go pas long dispela nupela teknikal haiskul.

Mista Uguro i stretim ol pepa wok wantaim Madang provinsal Edukesen atoriti na tu Nesenel Edukesen Dipatmen long rejistresen bilong dispela nupela teknikol haiskul.

Em i tokim Wantok Niuspepa dispela teknikol haiskul bai givim skil trening long ol sumatin long tred wok na tu kisim save long skul.

Em i tok plen bilong teknikol haiskul bai kamap wankain olsem Don Bosco Teknikol haiskul long Nesenel Kapital Distrik na ol susa teknikol skul bilong Don Bosco long Barawagi long Simbu provins.

Uguro i yusim save bilong em long kamapim ol skul bihain long em i bin wok pastaim olsem  provinsal edukesen plena long Madang.

Em i tokaut olsem plen long kamapim dispela nupela teknikol haiskul em long givim gutpela save long ol sumatin long Usino-Bundi distrik long rit na rait na kisim save long kauntim namba na save long mekim wok wantaim ol masin samting.

Dispela ol tred o praktikel skils wok bai givim save long ol sumatin long wok kapenta, welda, mekanik, plama na ol arapela tred skil na redim ol gut bihain taim ol i go bek long rurel ples na haus lain bilong ol.

Uguro i bin askim Praim Minista James Marape long mekim graun breking seremoni long makim kamap bilong dispela nupela teknikol haiskul sampela mun i go pinis.

Pastaim Minista bilong Edukesen Joseph Yopyyopy i bin stap na givim sapot long kamap bilong skul long dispela taim.

Uguro i tokaut tu olsem wanem ol tred skil i save long wok bai redim ol sumatin long kisim save long go wok wantaim ol risos projek long distrik olsem Ramu nikel/kobalt maining na tu gol na kopa divelopmen long Yandera na ol arapela risos projek long bihain taim.

Em i tok Usino i stap long namel ples na ol sumatin i ken go olsem long Bundi, Gama na ol arapela ples long Usino LLG long skul long nupela Usino teknikol haiskul.

Dispela em namba wan teknikol haiskul long Madang provins i kamapim.

James G. Kila i raitim