DELSIE Gagena em i eli lening tisa. Em i save skulim ol liklik pikinini long komyuniti bilong em.

Long 2011, ol komyuniti lida bilong Taurai ples long Tinputz, Not Bogenvil i bin makim Delsie long kisim “Native Line” trening we Atonomus Bogenvil Gavman (ABG) i save ranim long yusim neserel objek o samting long luksave long ol leta na saun.

Bihain long Delsie i bin kisim dispela trening, em i bin statim wanpela liklik klasrum aninit long haus bilong brata bilong em husat i bin dai na lusim. Nau dispela klasrum i kamap eli lening senta.

Delsie i go het long yusim ol skil na save em i bin kisim long “native line” trening long redim ol liklik pikinini long go insait long fomal elementri edukesen sistem.

“Mi save lainim ol sumatin long rit, rait na kaunt. Ol i save lainim poniks tu bilong redim ol long enrol long elementri skul,” Delsie i tok.

Lukautim ol liklik pikinini long eli lening senta em bikpela wok, tasol em i gutpela rot bilong divelopim sosol, emosinel na fisikal nid bilong ol pikinini.

Long 2014, Delsie i bin kisim moa trening long eli sailhud kea na edukesem trening we PNG na Gavman bilong Australia i save sapotim.

Eli sailhud kea na edukesen em i wanpela namba wan invesmen we kantri i mekim long sapotim divelopmen bilong wan wan pikinini.

Taurai lening senta save sapotim tu ol disebel pikinini. Fiona husat i gat 6-pela krismas na em i wanpela  pikinini i stap wantaim disabiliti tasol dispela i no pasim em long skul.

Fiona i driman long kamap nes long taim bihain na Taurai lening senta wantaim komyuniti i sapotim em.

“Mi laik ol pipel i mas save olsem disebel i no pasim yu long go long skul na kisim driman bilong yu,” Jane Harin, husat i save tis wantaim Delsie long Taurai lening senta i tok.

Carolyne Ketsimur i raitim