AKADEMIK stendet bilong olgeta praimeri, sekenderi na haiskul insait long Madang provins i pundaun i go daun tru namel long olgeta arapela skul insait long PNG.

Ekting Edukesen Dairekta bilong Madang, John Sigara i tokaut long dispela long las wik Fraide taim em i toktok long greduesen bilong Madang Tisa Koles.

Em i tok moa long 250 sumatin i bin greduet long MTC wantaim diploma long praimeri edukesen tisa.

Mista Sigara i givim salens long ol nupela tisa husat i greduet long MTC long go aut na bringim gutpela save long ol sumatin

Em i tok taim bilong skul nau i pinis na em taim nau bilong ol nupela tisa i go aut long bungim ol nupela salens na bringim gutpela save ol i lainim i go long ol pikinini na sumatin long ol rurel ples na taun skul long PNG.

Em i tok insait long rekot bilong Nesenel Edukesen Dipatmen (NDOE) ol sekenderi skul na haiskul long Madang provins i no stap insait long top ten o top 20 mak long sait long akademik ekselens o mak long sait bilong sabjek ol sumatin i lainim long em.

Em i tok ol nupela tisa husat i greduet long Madang Tisa Koles i mas yusim dispela olsem salens taim ol i go aut long wok tisa long ol skul long Madang provins.

Em i tok ol i no ken lusim taim long raun nating na wetim pe.

Ol i mas givim moa taim long skulim ol sumatin long lainim nupela samting long kamap gutpela manmeri bilong bihain taim.

Saut Ambenob viles kot klak, Tau Hans i tok tude long Madang provins em taim bilong bum-boks, dring ‘yawa’ o hombru na harim musik long de na nait we dispela i bagarapim tingting bilong planti ol yangpela.

Em i tok pasin bilong skul na lainim nupela samting na lukluk i go pas long gutpela wok ol sumatin bai mekim long bihain taim i nogat.

Em i tok ol papamama i lusim bikpela mani long baim skul fi tasol ol pikinini i no tingting long skul na laip bilong ol.

Em i tok ol sumatin i kisim daunbilo mak long skul i kaikai bilong kain pasin i gat na bihainim.

James G. Kila i raitim