LAS wik University of Papua New Guinea long Pot Mosbi i holim namba 65 greduesen bilong en long long tripela de.

Dispela 65 greduesen seremoni inap long kamap long mun Epril, 2020 tasol COVID-19 i mekim na ol i surik i kam long mun Novemba long las wik Mande, Tunde na Trinde. Ol rot bilong balus na sip i bin op na ol papa na mama, susa na brata, famili na ol pren bilong ol sumatin i kam long Pot Mosbi. Dispela greduesen i bin kamap long Sir John Guise Stadium Indo komplex.

Dispela 65 greduesen bilong UPNG i kamap insait long 3-pela de long bihainim lo bilong COVID-19 we i tok i no ken gat planti manmeri tumas i bung long wanpela hap.

Long dispela taim, ol famili bilong wanpela greduen, Sydney Waim, i bin kisim balus long kam long lukim greduesen bilong en. Mama bilong en, Grace Embiyo i bin kam daun long Pot Mosbi long Sarere na man husat i kamap olsem papa bilong en, Peter Uma i bin kam long Trinde las wik.

Ol i bin amamas tru olsem hatwok ol i mekim long pikinini man bilong ol Sydney Waim i no bin lus nating. Sydney Waim i greduet long UPNG na i kisim Digri long Bisnis na Menesmen.

Rebecca Negere i raitim