WAIPU Elementri skul long Enga Provins i bin bungim bikpela hevi bihain long bris bilong ol i bruk na pasim rot bilong ol pikinini na komyuniti.

Dispela i kamapim bikpela hevi long rurel ples olsem Waipu we i no gat gutpela bris na ol pipel long komyuniti i yusim diwai olsem bris.

Wanpela lida man bilong komyuniti  Larsen Kekae i askim gavman bilong Enga long luksave na wokim nupela bris we i ken stap strong na long taim bilong bikpela ren wara bai no inap karim go na tu bai no inap bagarap hariap.

Mista Kekae i bin gat bikpela wari long ol elementri sumatin na tu ol pipel bilong komyuniti i bin painim hat long wokabaut go skul na go long taun bikos long hevi bilong bris.

“Mipela i no save pasim han na stap nating bilong wanem mipela i save olsem em ples bilong mipela. Taim mipela i no senisim nupela diwai long bris em bai mipela olgeta i kisim bikpela taim olsem na mipela olgeta yangpela man na meri long komyuniti i save bungim han wantaim long pulim diwai na putim bris wantaim,” Larsen Kekae i tok.

Em i tok dispela em wok bilong komyuniti long sapotim ol elementri pikinini bilong ol long go het long skul bilong ol.

“Mipela olgeta i bin bungim han wantaim long putim bris na em i no namba wan taim. Dispela em i save kamap bipo yet kam inap nau na no gat gutpela divelopmen i kamap,” em i tok.

Em i tok hap we pipel i stap long en i save gat hevi olgeta taim na ol pipel i mas stretim dispela kain ol hevi long go het wantaim laip bilong ol.

“Long makim maus bilong Waipu komyuniti, mi laik askim Enga Provinsal Gavman o ol Memba bilong dispela ilektoret long luksave long dispela bikpela nid bilong mipela Neneo komyuniti na wokim nupela bris bilong mipela,” em i tok.

“Taim mipela i gat nupela bris em bai ken sapotim ol pikinini bilong mipela long wokabaut seif antap long bris na go kam long skul na kisim gutpela edukesen long bihain taim,” em i tok.

Jacklyn Kimala i raitim