TEST bilong lukluk na harim i stat pinis long rijon bilong Kokoda trek long luksave long ol manmeri na pikinini wantaim disabiliti na helpim ol wantaim aiglas o salim ol i go long ol sapot sevis.

Long dispela, Callan Service aninit long disabiliti asesmen program bilong Kokoda Initiative Program i mekim test bilong  moa long 300 pipel long harim na lukluk.

Ol i sekim ol manmeri na pikinini i stap long komyuniti, ol skul na ol helt senta long Sogeri na Mount Koiari long Sentral Provins.  Program menesa bilong Callan Service Peter Sindu na Ai na Iau trena Desmond Taboeya i go pas long mekim test na lukautim dispela program.

Ol manmeri na pikinini wantaim hevi bilong lukluk i kisim ol aiglas bihain long test na ol i salim ol arapela husat i nidim ol spesal aiglas i go long Callan Services Inclusive Resource Center o PNG Eye Care klinik.

Dispela program i luksave tu long ol arapela disabiliti na tu sekim ol baret we i stap na stopim ol sevis long i go kamap long ol dispela komyuniti.

Hai Komisina bilong Australia Jon Philip i tok dispela disabiliti asesmen program na raun bilong helt bilong mama na bebi em i sans bilong ol manmeri na pikinini long ol rurel komyuniti long kisim sevis long haus dua.

“Mi save wanem senis bai kamap long laip bilong ol lain husat i kisim aiglas long sait bilong lainim ol samting bikos mi yet mi save werim aiglas.

“Mi amamas olsem mipela i sapotim dispela program bilong sekim ai na iau.

“Insait long dispela, helt program bilong Kokoda Initiative inap long luksave long ol nid bilong ol manmeri na pikinini insait long ol komyuniti na ol i ken givim sapot long ol disabel manmeri na pikinini i stap long Kokoda trek,” Hai Komisina i tok.

Mista Sindu i tok tu olsem, dispela program em i bikpela samting long komyuniti na em i helpim ol pipel pinis.