Wanpela spesel banis sut ektiviti (SIA) we i kamap long dispela mun long Simbu provins bai helpim olgeta pikinini long Simbu provins aninit long 5-pela krismas.

Bikpela tingting bilong dispela ektiviti em long olgeta pikinini aninit long 5-pela krismas mas kisim polio banis sut na Vaitamin A na snek marasin.

Dokta Gilbert Hialwalyer, wanpela opisa bilong World Health Organization i stap long provins long las wik yet long sekim dispela ektiviti long provins na em i tok dispela ektiviti long olgeta sikispela distrik long provins  i kamap gut.

Dokta Hiawalyer wantaim ol tim bilong en na provinsal helt edvaisa Jerry Kubu i go raun long Gumine taim em i mekim dispela toktok.

Em i tok, SIA i bin stop long mun Jenueri i kam inap Oktoba bikos long COVID-19 pandemik. Em i tok Dipatmen bilong helt i holim strong banis sut tasol.

Em i tok WHO na UNICEF i givim mani long holim dispela ektiviti wantaim sampela helpim bilong provins. Em i tok Gumine Distrik i bin mekim baset long sapotim ol wantaim K600,000 tasol ol i bin kisim liklik hap moni tasol long dispela baset.

Ol tripela SIA tim i stap pinis long tripela lokal level gavman long Divine, Kumai-Bomai na Gumine. Ol sumatin bilong nes long Kundiawa Nesing Kolis i helpim 17 helt woka long Gumine sab-helt senta long karim aut dispela wok.

Namba wan yia sumatin bilong nes, Stanley Mond i  tok 11-pela sumatin bilong nes i helpim long Gumine Distrik na 120 i helpim long ol arapela faivpela distrik bilong Simbu.

Mista Mond i tok em i amamas long stap insait long wanpela tim na helpim long banisim ol pikinini long sik.

Memba bilong Gumine na Minista bilong Haia Edukesen, Risets, Saiens na Teknoloji, Nick Kuman i amamas long wok SIA i mekim na i tok Gumine Distrik Developmen Atoriti bai i go het long strongim ol infrastraksa bilong helt na tu ol arapela sevis long strongim ol komyuniti.

Wright Media i raitim