OL lida long kantri i mas soim gutpela piksa bilong bihainim ol lo bilong COVID-19 insait long Nupela Pasin we pipel i ken bihainim.

Kontrola bilong Pandemik Rispons, David Manning i mekim dispela tok. Em i tok, ol lida i save mekim bikpela wokmak long soim rot bilong rispon long COVID-19 long kantri. 

“COVID-19 i stap yet olsem birua long kantri bilong yumi na ol pipel i lukluk long ol lida na ol winman bilong kantri long olsem wanem ol i ken daunim dispela birua.

“Taim mipela ol lida i bihainim gut ol lo bilong helt aninit long Nupela Pasin, ol pipel bai lukim na bihainim long lukautim ol yet tu,” Mista Manning i tok.

Em i tok moa olsem Nupela Pasin em i bilong mekim pasin bilong stap klin i go pas long laip bilong laip bilong mipela. Pasin bilong werim pes mask taim yu stap long ples manmeri i pulap long en, stap longwe long arapela long ol dispela hap, wasim han klostu klostu na bihainim lo bilong kus em i no pasin bilong abrusim COVID-19 tasol, em i pasin bilong abrusim ol arapela ol sik we i save kalap i go i kam long ol manmeri na pikinini.

Mista Manning i tok, PNG nau i gat 602 COVID-19 keis na 7-pela i dai long dispela sik. Planti bilong dispela keis em ol i stap  long ol pipel krismas bilong ol i namel long 30 na 49.

Na em i tok ol sain bilong COVID-19 we ol i soim em, skin hat, insait bilong nek i pen, sotwin, skin guria, hetpen na masol pen.

Rebecca Negere i raitim