OL wokmanmeri bilong Yaibos Lutheran Helt Senta long Wapenamanda, Enga Provins, bai helpim gut ol sikmanmeri na pikinini long dispela ples bikos nau ol i gat 3-pela nupela tenk bilong wara na nupela abulisen blok o ples bilong waswas na toilet.

Long taim bilong kisim ol dispela tenk, Siaman bilong Yaibos Lutheran Helt Senta, Simon Kipongi i tok, “Taim ol medikol fesiliti insait long komyuniti i gat gutpela saplai bilong wara, ol i bai givim gutpela helt kea long ol sikmanmeri na pikinini.

“Yaibos Lutheran helt senta i bin salim ol sikmanmeri na pikinini i go bek long haus sampela taim i go pinis, bikos long dispela taim, ol i no bin gat inap wara long helpim ol sikmanmeri na pikinini. Tasol nau, haus sik i gat 2-pela 9000 lita na wanpela 2000 lita tenk bilong wara we i ken helpim ol long i go het na givim wara long ol sikmanmeri na pikinini na i no ken stop long namel. Tenkyu BSP,” Kipongi i tok.

Em i tok moa olsem, taim wara i stap klostu, ples na ol manmeri bai klin na luk nais. Em i tok, ol dispela tenk i kam long raitpela taim we komyuniti i gat bikpela nid long bihainim ol lo bilong COVID-19.

Thomas Tembil, Brens Menesa bilong BSP Benk long Wabag i tok, “BSP Benk i amamas long karimaut dispela projek long helpim ol sikmanmeri na pikinini long komyuniti.

“Mipela i save olsem insait long dispela projek bai mipela i ken senisim komyuniti na mipela i amamas long helpim komyuniti we i ken tanim bek na helpim mipela.” Mista Tembil i tok.