Moa long 50 helt kea woka long ol helt fesiliti long Nesenel Kepital Distrik (NCD) i kisim sampela moa trening bilong karimaut wokpainimaut bilong COVID-19 keis na tu stretpela rot bilong bungim ol sempol bilong mekim test long leb.

Trening i bin stat aste na bai pinis long tude. Dispela trening i strongim save bilong ol lain husat i stap insait long bungim infomesen o data wantaim wanpela wokpainimaut fom. Namel long dispela trening ol i mekim sampela prektis bilong bungim sempol long strongim tingting bilong ol helt wokmanmeri.

“Maski i gat evidens bilong COVID-19 long NCD, testing i no wok long kamap planti tumas na mi tingting planti. Olsem na ol COVID-19 keis we mipela i no harim na luksave long en i stap antap tru na mipela i no inap long save wanem em trupela namba bilong ol COVID-19 keis long NCD,” COVID-19 Nesenel Pandemik Kontrola David Manning i tok.

Nesenel Dipatmen bilong Helt, NCD Helt na World Health Organisation i go pas long dispela tuplea de trening.

“Mipela i wok long i go het long stretim ol samting we mipela i lukim olsem i no orait long rispon bilong mipela long COVID-19 na mi save olsem dispela trening bai apim save na strong bilong helt woka long bungim gut ol sempol,” Mista Manning i tok.

Kantri i gat 599 COVID-19 keis na long dispela sevenpela i dai, 586 em ol i kamap orait gen na sikispela tasol i sik yet na i stap. Long nau yet, 29, 466 pipel i bin kisim test bilong COVID-19 na 295 sempol i stap yet long leb na wetim risal.

Ol15 provins we i gat COVID-19 keis long kantri em, NCD, Western Provins, Isten Hailans, West Nu Briten, Sentral, Morobe, Is Sepik, Milen Be, Is Nu Briten, Enga, Nu Ailan, Wes Sepik, Sauten Hailans, Atonomos Rijon bilong Bogenvil, na Hela Provins.